El Principáu edita dos estudios arqueolóxicos alemanes sobre les cruces de la Victoria y de los Ánxeles

"La directora xeneral de Promoción Cultural y Política Llingüística, Consuelo Vega, presentó güei al públicu la edición de los estudios que los investigadores alemanes Victor H. Elbern (Düren -Alemania- 1918) y Helmut Schlunk (Bottschow -Alemania- 1906, Endingen -Alemania- 1982) realizaron a mediaos del pasáu sieglu sobre la historia y les característiques artístiques de les cruces de la Victoria y de los Ánxeles, guardaes na Cámara Santa de la Catedral d'Uviéu.

Vega presentó los trabayos en rueda prensa, acompañada pol editor científicu de la publicación, César García de Castro, el segundu director del Institutu Arqueolóxicu Alemán, Thomas Schattner, y l'arzobispu d'Uviéu, Carlos Osoro.

Baxo'l títulu 'Estudios sobre la orfebrería del Reinu d'Asturies', el trabayu inclúi, como principal novedá, la torna al castellán de la obra 'Ein fränkisches Reliquiarfragmente in Oviedo, die Engerer Burse in Berlin und ihr Umkreis' (1961), que recueye los estudios d'Elbern sobre les cuces d'Uviéu. Tamién inclúi una torna del trabayu 'Les cruces d'Uviéu' (1950) y una reedición de 'Les Cruces d'Uviéu. El cultu de la Vera Cruz nel Reinu d'Asturies', tornáu pol Ridea en 1985. Dambes obres son de Helmut Schlunk.

Los tres estudios incluyen documentación histórica, gráfica y artística sobre les dos cruces, asina como datos sobre la so rellación cola cultura carolinxa y con otres obres d'arte orfebre de la época medieval.

Schattner, director del institutu que Helmut Schlunk fundó n'España nos años 50, foi en representación d'Elberg, quien pola so avanzada edá (90 años), nun pudo realiar el viaxe dende Alemaña. Mostró l'agradecimientu del investigador alemán, lleyendo una carta personal escrita pa la ocasión, y destacó la importancia que l'arte asturianu, y especialmente la so orfebrería, tuvieron pa los dos estudiosos xermanos.

Como exemplu, esplicó la trayectoria de Schlunk, quien fundó nos años 50 l'Institutu Alemán n'España, y dempués interesóse pol estudiu del arte asturianu.

Osoro destacó la importancia d'estes dos cruces pa la conocencia de los raigaños del pueblu asturianu, mientres Vega consideró'l trabayu una forma de ""conocer los orixes d'Asturies"", tres espresar el so agradecimientu al Arzobispáu, por prestar la so collaboración na realización de los trabayos."