El PP nun va retomar los trabayos de la reforma hasta conocer el resultáu de les negociaciones ente PSOE y IX

"El presidente del PP n'Asturies, Ovidio Sánchez, aseguró güei de que de ""confirmase les noticies apaecíes en prensa sobre les negociaciones ente'l PSOE y IX lo más razonable ye aplazar la negociación del nuevu Estatutu"", pa saber les posiciones nes que queda cada fuerza política y si caltienen o non les sos posiciones. ""Si l'Estautu va ser un elementu a tratar ente les negociaciones de PSOE y IX nós debemos sabelos y lo prudente poro ye esperar a ver si se consolida o non esa negociación"", dixo.

Sánchez, qu'ofreció güei una rueda prensa en Pola L.lena, afirmó que cabe esperar que nes negociaciones ente PSOE y IX tamién toquen l'asuntu de la reforma estatutaria, y nesti casu nun se pue olvidar qu'IX taba ""radicalmente a la escontra de tolo qu'acordamos col PSOE y el PP"".

De primeres taba previsto que la ponencia estatutaria retomase los sos trabayos el próximu llunes día 15, dempués de que nel mes de xunetu se pesllare la primer fase de los trabayos con un acuerdu casi total ente PSOE y PP, menos nel casu de la capitalidá. Sánchez aseguró güei que, al marxe del ""nuevu escenariu"", los miembros del PP qu'integren la ponencia tienen que dir el llunes a la Executiva del partíu, en Madrid.

Los tres grupos parlamentarios mostraron la so intención de tener la reforma pesllada enantes de qu'acabe l'añu, pero esi parón nes negociaciones diba complicar el calendariu. Entrugáu por esti retrasu, Ovidio Sánchez manifestó que'l mesmu ""nun depende del PP porque los 'populares' nun tán negociando con naide"".

""Depende de los qu'introducen un nuevu elementu na política asturiana, como ye'l pactu de Gobiernu, dalgo llexítimu, pero que supón una nueva situación"", insistió Sánchez."