Sidres de gala de cuatro continentes van participar nel VII SISGA

El VII Salón Internacional de les Sidres de Gala (SISGA) va celebrase ente’l vienres y el domingu en Xixón. Nesta edición participen bébores de cuatro continentes, con presencia d’ellaboradores de países tán llonxanos como Estaos Xuníos, Xapón o Sudáfrica.

El vienres, a les 12.45 horas, va abrise’l certame cola recepción oficial d’autoridaes nel salón de recepciones de la Casa Conceyu de Xixón, actu nel que van tar presentes Carme Pérez, de la Fundación Asturies XXI, entidá organizadora del SISGA; Jesús Martínez Salvador, conceyal de Turismu, Deportes, Fiestes y Mocedá; Andrew Long, parllamentariu británicu y conceyal na población córnica de Truru; Shoji Tamura, representante municipal d’Hirosaki (Xapón); Mario Bertuleti, alcalde d’Antèy (Val d'Outa); y Emmanuel Clement, direutor de la Office du Tourisme de Le Mans (Francia). Estos representantes acuden a Asturies en compañía de productores de los sos respuetivos países pa sofitar el so llabor y, al empar, estrechar llazos coles autoridaes llocales.

Esa mesma mañana va tener llugar el concursu pa escoyer les meyores sidres del SISGA en cada categoría, llabor del que va encargase un xuráu internacional, y, yá de nueche, la cena de gala y entrega de premios. El sábadu, mentes, va celebrase l’actu central abiertu al públicu: la cata abierta na Colexata de San Xuan Bautista.

Ésta va comenzar a les 12 hores y va allargase hasta les 21 hores, con entrada a 5 euros qu’inclúi una copa y el derechu a prebar les sidres participantes, que van contar con un puestu propiu p’amosar les sos sidras esplumoses –brut, dulces, semisecas y rosass–, sidres de xelu, aguardientes, sidres feches con ingredientes diversos, aperitivos de sidra o tercios d’esta bébora. En total son más de 15 los productores participantes de países de los cuatro continentes, como Estaos Xuníos, Xapón, Portugal, Alemania, Sudáfrica o República Checa, amás de delles asturianos.

Pa finar, el domingu va entamase una xornada orientada a sumilleres profesionales, a  les 10.30 hores, asina como’l I Alcuentru de Periodistes y Bloggers de la Sidra darréu.

Na semeya: Actu de presentación  de la VII SISGA, con Jesús Martínez Salvador, Carme Pérez, Celestino Cortina y Jorge González-Palacios.