Les agrupaciones socialistes que sofiten la enmienda de la oficialidá representen al 70 por cientu de la militancia

Diecienueve agrupaciones tres la incorporación última de Mieres, a les qu’hai que sumar a les Mocedaes Socialistes d’Asturies y a la Sectorial Autonómica d’Educación, sofiten la enmienda de la oficialidá pal congresu de la FSA d’esta fin de selmana n'Uviéu. Representen a cerca del 70 por cientu de la militancia.

La propuesta de consensu presentada pola plataforma ‘Socialistes pola Oficialidá’ algamó un gran apoyu nes agrupaciones con mayor afiliación, como Xixón, Uviéu, Llangréu o Mieres. Llaviana, Corvera, Samartín del Rei Aurelio, Siero, Nava, Candamu, Morcín, Parres, Llanera, Ḷḷena, Sariegu, Ayer, Sobrescobiu, Villaviciosa y Casu son los otros conceyos onde l’apoyu a la enmienda de la oficialidá llogró salir alantre de cara al congresu que va dar comienzu'l vienres.

Iniciativa pol Asturianu celebra esta situación y anima a la Federación Socialista Asturiana (FSA) a “que se sumen al consensu pa da-y futuru al asturianu, lo que nel marcu actual de la Constiución española pasa per una midida: la oficialidá. Dar esti pasu ye'l camín hacia la igualdá de los falantes y el reconocimientu de la nuesa llingua n'igualdá de condiciones col restu de les d'España”.

D’igual forma, destaca que’l testu propuestu “llega con un gran consensu internu nel partíu, consensu que esiste yá va tiempu na sociedá asturiana, onde les encuestes falen d'un apoyu mayoritariu a la oficialidá dende va décades. Los y les socialistes d'Asturies nun pueden quedar al marxe d'esti cambiu sociolóxicu”.

Na semeya, un momentu de la defensa de la enmienda por parte de César González Herrerías na agrupación de Xixón, la que tien más militancia n'Asturies.