El Proyectu 2018 de la XDLA suma apoyos ente partíos y la universidá

Foro, Podemos y Izquierda Xunida (IX) amosaron el sábadu en Xixón el so sofitu al ‘Proyectu 2018 pola Oficialidá’, cola presencia destacada de l’alcadesa Carmen Moriyón. El rector Santiago García Granda apuntó na so intervención que la Universidá “ta comprometida y apoya la oficialidá”.

Una carpa instalada na cai Tomás y Valiente sirvió pa una presentación que, nun primer momentu, taba prevista pal Festival Arcu Atlánticu y que s’aplazó pola negativa d’Ana Montserrat López Moro, conceyala d’Educación y Cultura, y Raquel Huergo, direutora de la Fundación Municipal de Cultura, Educación y Universidá Popular de permitila por considerala política, una posición que Moriyón refugó díes depués. Sicasí, el cambiu de fecha permitió que’l ‘Proyectu 2018 pola Oficialidá’ ganara en visibilidá y sumara más apoyos entovía, como amosó l’amplia representación de partíos políticos, sindicatos, coleutivos y ámbitos académicos que tuvo l’actu.

García Granda protagonizó una de les intervenciones más favoratibles a la oficialidá del idioma, asegurando que la Universidá d’Uviéu “ta comprometida y apoya la oficialidá”. El diputáu Pedro Leal foi l’encargáu d’intervenir por parte de Foro, que defendió la proteición del patrimoniu llingüísticu del país, ensin nomar en nengún momentu la pallabra ‘oficialidá’.

Emilio Léon, por Podemos, y Concha Masa, por IX, foron los otros responsables políticos que tomaron la pallabra, anque ente’l públicu pudieron vese a diputaos nel Congresu, como Sofía Castañón (Podemos), o na Xunta Xeneral, y conceyales y alcaldes, como’l de Bimenes, Aitor García Corte. Xosé Ramón Iglesias Cueva, secretariu de l’Academia de la Llingua Asturiana (XDLA), tamién intervino nel actu, proponiendo “un formulariu asemeyáu a ésti:

1. L’asturianu y el castellanu son llingües oficiales del Principáu d’Asturies, tamién el eonaviego o fala nel so ámbitu territorial, Navia-Eo. Tolos ciudadanos y ciudadanes tiene l derechu a conocelos y emplegalos llibremente.
2. Los poderes públicos d’Asturies aseguraran pentemedies d’una Llei d’Usu y Enseñanza l’emplegu normal y oficial de dambes llingües en tolos ámbitos de la vida pública, cultural ya informativa, y pondrán a disposición de los usuarios los medios necesarios pa facilitar la so conocencia.
3. Naidie podrá ser discrimináu por mor de la llingua qu’emplegue”.

Procesu p’abrir una reforma del Estatutu d’Autonomía

El ‘Proyectu 2018 pa la Oficialidá’ busca utilizar la vía del artículu 56.1 pa iniciar un procesu de reforma del Estatutu d’Autonomía, que permite facelo si se suma l’apoyu d’una cuarta parte de la Xunta Xeneral, esto ye, 12 diputaos. Cola suma de los parllamentarios de Podemos, IX y Foro, superaríase ampliamente dicha cifra, al sumar 9, 5 y 3, de manera respeutiva; esto ye, 17.

Sicasí, entovía taríase lloñe de los 27 necesarios p’apobar la reforma definitiva qu’incorporara la oficialidá, polo que se necesitaría l’apoyu de la FSA, que nel so congresu d’esta fin de selmana va aldericar precisamente esti asuntu gracies al esfuerciu d’un grupu de militantes que baxo la plataforma ‘Socialistes pola Oficilidá’ consiguió’l sofitu de casi dos decenes d’agrupaciones llocales, les mocedaes y l’área d’enseñu de la formación.