El Pali que Pali Fest celebra en Bimenes la so primer edición

Tien como sede Santuyano y amás de música ufierta mercaos sociales, poesía o talleres.

Esta población yerbata va tener per trés díes una axenda cargada d'actividaes que va comenzar esta nueche a les 21 hores coles actuaciones de Pa Tocar y Los Jandrix, a lo que va siguir un escenariu abiertu y una pinchada con DJ Noxima!. Los Mercaos Sociales d'Asturies van abrir a les 10 hores de mañana, mentes qu'a les 11 hores ta previsto la inauguración d'una amuesa d'arte mural, un taller de bioconstrucción y l'entamu d'actividaes pa pequeños y mayores a cargu de l'Asociación Rellugu.

A les 13.15 hores va dar comienzu un recital de poesía con Ana Lamela, pa siguir con un recital-conciertu a cargu de Reverso y una actuación de Mbolaos. Yá de tarde, a les 17 hores, van organizase xuegos tradicionales y van siguir los talleres de la mañana, pa zarrar la xornada coles actuaciones, dende les 20 hores, d'Antón y Menchaca, Rapsodas, Voodoo Grass, Ajolote y Skama la Rede.

Los Mercaos Sociales d'Asturies van abrir el domingu a les 11 hores, xornada na que van ufrir conciertos dende les 13.30 hores Alicia Villanueva, Toli Morilla y Ún de Grao. Pa la xente de fuera de Bimenes ponse a lo so disposición un prau p'acampar mientres el festival, anque los responsables del Pali que Pali Fest recomienden ponese en contautu con ellos pa una mayor organización del llugar.