L'eurodiputáu Garriga (PP) diz qu'España podría enfrentase a una sanción de la UE pol aumentu de coste d'El Musel

"L'erodiputáu asturianu del PP, Salvador Garriga, mostróse güei ""preocupáu"" polos problemes de financiación de les obres d'ampliación del puertu d'El Musel (Xixón). Dixo que ye ""incompresnbile"" que'l Gobiernu español pretendiere buscar fondos de la Unión Europea pa financiar el modificáu de la obra. A xuiciu de Garriga, la ""mala xestión"" pue hasta conllevar a España que la UE abra un procedimientu de sanción, dalgo que pue nel peor de los casos, obliga a devolver dalgún tramu de financiación de los fondos de cohesión con cargu al periodu anterior, 1999-2006.

Garriga recordó que dende hai tiempu lleva alvirtiendo que la Unión Europea nun financia por fondu de cohesión por reglamentos nengún modificáu, a nun ser que se dea dalguna circunstancia d'urxencia, ""que nun se daba nesti casu"". Añadió que, según los reglamentos de la UE, tou modificáu tien que tar sacáu a subasta pública, dalgo que nun pasó nesti casu.

Según Garriga, los responsables de la obra tamién conocíen en xunetu que nun diben contar con fondos. ""Caún va tener qu'asumir les sos propies responsabilidaes nel so día"", señaló. Afirmó que l'asuntu lleva nel serviciu d'auditoría de la Comisión Europea dende'l mes d'abril.

L'eurodiputáu señaló que nes cartes que se vinieron cruzando ente la Comisión y el Gobiernu d'España, quedó claro qu'hai dos direiciones xenerales de la Unión Europea qu'oxetaron a les pretensiones de buscar fondos pa facer frente al escesu coste. Trátase de la Direición Xeneral Rexonal y la Direición Xeneral de Mercáu Interior. Esta última, según Garriga, ""nun ve claro cómo España pue pidir dineru pa un modificáu"".

El Gobiernu d'España debería d'aportar yá tola documentación requerida, según Garriga, de manera que la Comisión tenga tres meses más pa examinala toa, y hasta abrir un procedimientu de sanción. ""Hasta payares, nun diba haber nenguna decisión"", señaló.

Llamentó que, n'otres ocasiones, la práutica almitida en grandes obres ye la d'anular tramos pa poder cobralos dempués. Según Garriga, lo único que podría dase diba ser la concesión d'una ampliación, pero fuera de plazu, dalgo que va depender de les negociaciones ente'l Gobiernu d'España y la Unión Europea. ""Esto nun ye sólo problema d'Asturies, sinón d'España, onde tien qu'haber una gran preocupación"", dixo.

A xuiciu de Garriga, la situación ye ""llamentable"" porque afeuta a una gran obra del Cantábricu. ""Al final, la mala xestión vamos pagala los contribuyentes españoles"", dixo. En tou casu, dixo que nun algama a entender cómo los téunicos y funcionarios de Fomentu intentaron la vía entamada, dao que la reglamentación ta clara. ""Too apunta a qu'al final de too esto va haber que pidir responsabilidaes y hasta dimisiones"", señaló.

L'escesu de coste de les obres d'El Musel sube a 216 millones ensin IVA. El presidente de l'Autoridá Portuaria de Xixón, Fernando Menéndez Rexach, ta acabante d'almitir que'l proyeutu sólo tien fondos garantizaos hasta finales d'esti añu. El Conseyu d'Alministración de l'Autoridá Portuaria de Xixón axudicó l'actuación por 580 millones d'euros."