La campaña asturiana de seguridá vial aporta a Xixón, Llugones y Avilés

Lleva'l lema 'Al volante que nun te piquen'.

Entamada pol Gobiernu y la Dirección Provincial de Tráfico, esta campaña busca llevar a la mocedá a la reflexón sobre los peligros que suponen pa la conducción l’usu del móvil y el consumu d’alcohol o cannabis. Les actividaes de cai son la novedá principal d’una campaña que fuxe de la prohibición ensin más, encargándose mozos y moces de treslladar el mensaxe que tamién se ta difundiendo al traviés de les redes sociales y con cartelos, vinilos y posavasos en llocales d’ociu, l’allugamientu de mupis en delles localidaes y el repartu de camisetes y bolses.

En concreto, les aiciones, que yá s'entamaren previamente en Cangas del Narcea y Llanes, van realizase güei na playa d’El Natahoyo de Xixón y nel parque de La Paz de Llugones, mentes que n’Avilés van facese’l domingu na plaza de Santiago López. Ta previsto que se repita'l mes qu'entra n’Uviéu coincidiendo coless fiestes de San Mateo.

Mediadores del Conseyu de la Mocedá van tar presentes en dichos puestos informativos, onde se van poder facer controles d'alcoholemia o participar en circuitos con unas gafas de realidá virtual que simules los efeutos d’una intoxicación etílica y la so consiguiente repercusión na conducción.

Incidencia del alcohol y les drogues nos accidentes

"Esti proyeutu surde de la necesidá de sensibilizar a la mocedá na conducción responsable p’amenorgar los niveles de siniestralidá y prevenir accidentes. Según les cifres de Tráficu, l’alcohol tien incidencia ente’l 30 por cientu y el 50 por cientu de los accidentes mortales; el 43 por cientu de los conductores muertos presentaron nes autopsies resultaos positivos de droga, psicofármacos y alcohol en sangre, conxunta o aislladamente, y les distracciones tán detrás del 24 por cientu de los accidentes y del 35 por cientu de les muertes", informen dende'l Gobiernu.