Unes 12.000 persones asisten al actu institucional de la 'Diada', mientres detienen a un mozu en Lleida

"Ente 12.000 y 15.000 ciudadanos, según los organizadores, asistieron güei nel parque de la Ciutadella nel tradicional actu institucional organizáu conxuntamente pol Parlamentu y el Gobiernu con motivu de la celebración de la 'Diada' Nacional de Cataluña.

El presidente de la Generalitat, José Montilla, y el presidente del Parlamentu catalán, Ernets Benach, encabezaron a les autoridaes, que contaba cola presencia del vicepresidente del Gobiernu catalán, Josep Lluís Carod-Rovira, del conseyeru d'Interior, Joan Saura, y otros conseyeros.

Xunto a ellos, la Mesa del Parlamentu y los cabezaleros de los grupos parlamentarios: Artur Mas (CiU), Manuela de Madrid (PSC), Joan Puigcercós (ERC), Jaume Bosch (ICV-EUiA) y Daniel Sirera (PP). Tamién tuvieron los ex presidentes Jordi Pujol y Pasqual Maragall, pero nun fueron a la cita nengún de los ministros catalanes nel Gobiernu de José Luis Rodríguez Zapatero. Ente los convidaos, taben el cabezaleru del BNG, Anxo Quintana, y el del PNV, Íñigo Urkullu.

Demientres l'actu conmemoróse'l centenariu del nacimientu de la escritora Mercè Rodoreda, el milenariu del nomamientu del Abat Oliba como abad de los monasterios de Santa María de Ripoll (Girona) y Sant Miguel de Cuixá (Francia) y el centenariu del Palau de la Música, construyíu hai cien años pol arquitectu Lluís Domènech i Muntaner.

L'eventu entamó cola entrega de la 'senyera' per parte del presidente de la Generalitat, José Montilla, al xefe de la formación de gala de los Mossos d'Esquadra pa que fuere llevantada. Esta bandera procede de Ripoll, ciudá que celebra'l milenariu nomamientu del Abad Oliba.

UN DETENÍU.

Per otra parte, los Mossos d'Esquadra detuveron güei en Lleida a un mozu independentista na cai Cavallers, nel centru la ciudá, nel momentu nel que l'Ayuntamientu taba celebrando l'actu institucional de la Diada, según pudo presenciar Europa Press.

La detención del mozu, Gerard G.F., miembru de l'Asamblea de Mozos de Lleida, prodúxose dempués d'un forcexu ente un grupu de mozos y los Mosos d'Esquadra, nel qu'hasta cayó al suelu una muyer, y dempués de glayíos como ""políticos traidores"" per parte de los independentistes, que poco dempués teníen convocada una manifestación ente la plaza de la Paeria i Blondel.

Esti añu, los independentistes recibieron con glayíos a los grupos de CiU y la delegación d'Unión Democrática. ""A mí nun m'engaña, CDC ye España"" y ""fuera políticos traidores"" fueron dalgunos de les conseñes que cantaron los manifestantes, qu'otros años, recibíen asina a otres fuerces polítiques, sobre too populares y republicanes.

Tamién na Diada d'esti añu, la Policía Llocal y los Mossos optaron por incrementar el so númberu d'axentes nes cais de Lleida. Al mesmu tiempu, nos actos llúdicos y reivindicativos de güei rexistróse menos participación ciudadana, fechu que los grupos políticos de Lleida atribuyeron a que la Diada cayó en xueves y que mañana munchos trabayadores van facer puente."