El PP xixonés pide quitar a IX del Conceyu pola paralización d'El Musel, y la coalición defende la denuncia ante la UE

"El Grupu Municipal Popular del Ayuntamientu de Xixión reclamó güei la salida de los miembros d'IX-Bloque por Asturies-Verdes del Gobiernu llocal, al consideralos responsables de la ""posible paralización"" de les obres d'ampliación del puertu d'El Musel.

La presidenta del PP xixonés y vocera del grupu popular, Pilar Fernández Pardo, señaló güei nun comunicáu, que l'alcaldesa de Xixón, Paz Fernándz Felgueroso, ""calló y ocultó tolo que conocía d'esti procesu de paralización por una única y maliciosa razón: el cómodu caltenimientu de la mayoría que-y permite gobernar nel Conceyu"". ""Ye cómpliz d'esta posible paralización"", añadió.

""Xixón cuerre'l gravísimu riesgu de perder una aportación procedente de los fondos de la Unión Europea destinaos a la continuación de les obres del puertu d'El Musel, por importe de 135 millones d'euros, pola mor direuta d'una denuncia política presentada por Izquierda Xunida ante los organismos competentes de Bruseles"", apuntó la vocera del PP xixonés.

Según recordó'l PP llocal, IX sostuvo nesa denuncia que la obra d'El Musel yera ""faraónica"" y ""innecesaria"" y qu'incumplía les normes que regulen la concesión d'estos fondos pa obres públiques per parte de la Unión Europea.

""Ello, escontra'l criteriu favorable de la propia Autoridá Portuaria de Xixón, onde ta presente l'alcaldesa Paz Fernández Felgueroso, l'Alministración del Estáu, el Ministeriu de Fomentu, el Gobiernu del Principáu y l'Abogacía del Estáu, que defendíen la llegalidá de les ayudes comunitaries, determinantes pa que les obres continúen y puea finalizase l'ampliación d'El Musel, anque seya con retrasu"", señaló.

Pal PP, ta ante ""la obra pública de mayor volume económicu realizada enxamás, non sólo en Xixón, sinón en toa Asturies y que tres la esviación presupuestaria espresada'l pasáu añu, supón una inversión de 800 millones d'euros"". ""Una obra que queda agora paralizada porque sólo hai fondos pa continuala demientres tres meses, según declaró'l propiu presidente de l'Autoridá Portuaria de Xixón, Fernando Menéndez Rexach, y se desconoz d'ónde van algamase más recursos nun plazu tan cortu de tiempu, de magar el 31 d'avientu próximu"", llamentó'l PP de xixonés.

Pa la vocera de los 'populares' xixoneses, la responsabilidá d'IX-BA-LV, que gobierna en coalición col PSOE en Xixón y que foi llamada a gobernar n'Asturies per parte de la FSA-PSOE, ""ye facer tolo posible pa qu'esos fondos desapaecieren, nun vinieren a Asturies nin a Xixón y nun s'ampliare'l puertu"".

""Denunciaron ante la UE, con una finalidá sólo política, qu'había una violación de les normes na concesión d'eses ayudes solicitaes, fondos imprescindibles pa continuar la obra"", remarcó'l PP.

IX Y VERDES RESPUENDEN

El diputáu d'IX-BA-LV na Xunta, Francisco Javier García Valledor, dixo güei que los responsables de la obra ""usen la denuncia de los Verdes pa tapar les sos responsabilidaes sobre la pésima xestión y el despilfarru de dineru públicu nesta obra"".

""Culpar a los que destapen chanchullos ye indecente"", remarcó Valledor, pa quien los responsables del puertu ""tienen de garantizar la tresparencia y total honestidá na xestión, lluz y taquígrafos pa esta obra pública"".

Pa Valledor, nun pue ser que n'Asturies les grandes inversiones ""tornen n'auténticos furacos negros presupuestarios"". ""El dineru públicu tien de ser xestionáu con eficacia y eficiencia. Col dineru que representa l'aumentu de costu d'El Musel podría pagase un nuevu hospital como l'HUCA. Nun son pallabres menores"", recuerda Valledor.

Otru elementu que preocupa a IX-BA-Verdes ye que ""los escesos de coste signifiquen más dineru de toos nel bolsiellu d'unos pocos"". ""La primer obligación d'un responsable públicu ye esplicar esto a la sociedá asturiana: qué motivos y qué causes puen xustificalo"", asegura Valledor.

Pela so parte, los Verdes d'Asturies ficieron güei públicu un comunicáu nel que xustifiquen la so denucnia ante la UE nel ""orixe escuru y sospechosu del enorme escesu de coste"". N'opinión de la organización, los responsables del aumentu de coste ""deberíen dimitir"" poles ""graves consecuencies pa la rexón"".

La reaición de los Verdes se produz dempués de que'l presidente de l'Autoridá Portuaria de Xixón, Fernando Menéndez Rexach, reconociere que la denuncia de los Verdes xenera ""dificultaes"" a la concesión de financiación adicional.

Pa la organización, l'aumentu de coste supón una modificación contractual que creen ""illegal"" y que xenera un ""espilfarru innecesariu y suciu de recursos públicos moviendo piedres en camiones d'un llau pa otru"". ""Ye un escandolosu engañu a la UE, a la que, con malicia, se-y viende nel Programa Operativu del Fondu de Cohesión como una supuesta segunda fase, cuando ye un simple aumentu de coste"", espunxeron los Verdes nun comunicáu.

A xuiciu de la formación ""de tener dalgo de real esi escesu de coste nun debería ser asumíu poles alministraciones españoles o europees, sinón que debería dar llugar a parar y replantegar el proyeutu, o a ser asumíu poles empreses axudicataries"".

Pa la organización, los recursos de Fondu de Cohesión que reciba España y la rexón ""deberíen destinase a proyeutos reales, y d'impautu ambiental positivu que, d'aceptase l'escesu de coste, quedaríen ensin financiación, como los de reducción, reutilización y reaprovechamientu de basories y los de sanimianetu"".

Los Verdes dicen confiar na ""imparcialidá"" de la UE porque entienden que ""ellí ye más difícil que lleguen les fuertes presiones de los poderosos n'España --empreses y cargos públicos-- qu'equí munches veces algamen ocultar tolos chanchullos ensin que'l ciudadanu pue facer nada eficaz""."