El Gobiernu promueve ayudes pa rebaxar la emisión de gases n'empreses

Cofinanciaes pola XE al traviés del Fondu Européu de Desarrollu Rexonal (Feder), apoyen proyeutos d'eficiencia enerxética.

La Conseyería d'Emplegu, Industria y Turismu destina 1,6 millones d'euros a la convocatoria de subvenciones pa favorecer el pasu a una economía baxa en carbonu en tolos sectores per aciu la execución de proyectos d'eficiencia enerxética. Esta cantidá ta cofinanciada pola Xunión Europea (XE).

La iniciativa trata d'impulsar l'aprovechamientu de los recursos anovables autóctonos de biomasa forestal y el calor d'agua de mina. Tamién pretende l'adopción de midíes pal aforru enerxéticu y l'amenorgamientu de les emisiones de gases causantes del cambiu climáticu.

Al empar, estes ayudes económiques busquen ameyorar la competitividá de les empreses y contribuyir al establecimientu d'un marcu favoratible pa la creación y afitamientu d'emplegu nes zones nes que se desenvuelvan estes actividaes. Van poder solicitar estes ayudes les empreses, incluyendo aquelles provisores de servicios enerxéticos, que promuevan l'usu de fontes anovables, mesmo que les qu'impulsen acciones d'aforru y eficiencia, teniendo en cuenta que nun se puede empecipiar el proyectu o actividá enantes de la presentación de la solicitú de l'ayuda.

El plazu pa la entrega de solicitúes va comenzar cuando s'espublice la convocatoria nel Boletín Oficial del Principáu d'Asturies (BOPA) y va rematar el 15 de setiembre.