Cargos de toles fuercies polítiques, a esceición del PP, pasaron pel stand d’Iniciativa na FIDMA

Alredor de cuarenta cargos institucionales, ente ellos alcaldes y eurodiputaos, visitaron el stand d’Iniciativa pol Asturianu na Feria Internacional de Muestres d’Asturies (FIDMA). El presidente del país, Javier Fernández, protagonizó’l momentu más destacáu al so pasu pel mesmu nun paséu d'autoridaes pel recintu ferial.

“Foi estupendo. Tamos mui contentos colos resultaos de la esperiencia. Les empreses que nos acompañaron vendieron mui bien y demostróse la demanda de productos n’asturianu. A la xente, cuando los ve, interesa-yos”, resume Inaciu Galán, presidente d’Iniciativa pol Asturianu, estos 16 díes de feria. A ello hai que sumar la gran cantidá de cargos y responsables políticos que s’averaron, convocaos pola organización cívica, al puestu asitiáu nel pabellón 3 del Recintu Ferial Luis Adaro.

“Tuvimos contautos con toles fuercies polítiques, a esceición del PP, al que convidamos, pero nun nos respondieron. Falamos sobre la oficialidá y normalización, con una atención especial colos cargos del PSOE, de cara al congresu de la FSA que s’avera”, esplica Galán. Na llista amplia de visites destaquen nomes como’l candidatu a sectetariu xeneral socialista y alcalde de Llaviana, Adrián Barbón, “que s’amosó favoratible a abril l’alderique de la oficialidá nel partíu”; otros primeros ediles como la socialista Amelia Fernández López (Carreño) y l’asturianista Aitor García Corte (Bimenes); la vicealcaldesa d’Uviéu, Ana Taboada (Somos Uviéu); l’eurodiputáu socialista Jonás Fernández; el conseyeru d’Educación y Cultura, Genaro Alonso; el direutor xeneral de Planificación Llingüística y Normalización, Fernando Padilla; el voceru de Ciudadanos na Xunta Xeneral, Nicanor García Fernández;  los diputaos Concha Masa y Gaspar Llazamares, asina como’l coordinador xeneral d’Izquierda Xunida, Ramón Argüelles; el de Podemos Enrique López Hernández; y conceyales de dellos ayuntamientos asturianos.

Una visita inesperada foi la del presidente d’Asturies, que nel so pasu pel pabellón xunto a autoridaes recibió una educada demanda de la oficialidá del idioma por parte de Galán tres enseña-y el stand y comenta-y la presencia de “seis empreses qu’utilicen l’asturianu”. “Tenemos que volver a reclama-y la oficialidá una vez más”, que cortó Fernández con un “hacéis bien, joder”, pa continuar Galán apuntando que “ye la única solución que tien esti idioma si queremos que tenga futuru”, pa, por últimu, felicitalu pol plan pilotu qu’incorpora l’asturianu como llingua vehicular en cuartu de Primaria de dellos colexos nuna asignatura.

Estes pallabres de Fernández, rexistraes poles cámares de ‘Alderiques d’Asturies’ y otros medios que siguíen la marcha del presidente pela FIDMA, tuvieron una amplia repercusión en redes sociales.

Munches ventes

L’espaciu d’Iniciativa pol Asturianu na FIDMA tamién foi’l de seis empreses asturianes: les editoriales, Ediciones Trabe, Saltadera y Pintar-Pintar; la empresa d’animación, Trebeyos; la tienda-marca de productos de regalu Miguina de Pan; y una productora audiovisual y de márketing, CuatroGotes Producciones. Toes elles tuvieron un altu nivel de ventes y pudieron facer contautos con otres empreses, lo qu’invita al coleutivu cívicu a repetir esperiencia l’añu qu’entra.

“Contábemos con una importante venta de regalos, pero sorprendiónos l’altu volume de venta de llibros, casi al empar”, rellata Galán, que destaca cómo “la xente tien interés na lliteratura asturiana cuando ve físicamente los llibros”. Y ye que la visibilidá de los productos asturianos y l’idioma yera ún de los oxetivos d’Iniciativa pol Asturianu con esti stand: “Y consiguímoslo. La xentes averábase, entrugaba y animábanos”, destaca’l presidente de l’asociación, que tamién sumó socios nuevos a les sos files.

Ente los llibros más vendíos citó la torna de la ‘Odisea’, el clásicu d’Homero; traducciones tamién de William Shakespeare feches por Saltadera; y la gramática d’Esther García, siendo munches les persones de fuera del país que s’interesaron y mercaron exemplares. Mentes, Miguina de Pan tamién rexistró un ésitu destacáu colos sos productos n’asturianu.