Rusia va establecer güei rellaciones diplomátiques con Abjazia y Osetia del Sur

" Rusia va establecer güei rellaciones diplomátiques coles rexones separatistes xeorxanes d'Abjazia y Osetia del Sur, según anunció ayeri'l Ministeriu d'Asuntos Esteriores, menos de dos selmanes dempués de que Moscú reconociere la so independencia.

""Va haber un intercambiu de notes sobre l'establecimientu de rellaciones diplomátiques a nivel d'embaxador ente Rusia y los estaos mencionaos"", señaló'l Ministeriu nun comunicáu, precisando que'l titular d'Esteriores, Sergei Lavrov, va aconceyase güei con representantes de les dos rexones.

L'anunciu prodúxose poco dempués de que Medvedev, en rueda prensa col presidente francés, Nicolas Sarkozy, va asegurar que la reconocencia per parte de Rusia d'Abjazia y Osetia del Sur nun tien marcha p'atrás. ""Ye una decisión definitiva"", aseguró.

Nesti sen, adelantó que Rusia ya tenía preparaos los acuerdos sobre l'establecimientu de rellaciones diplomátiques con Abjazia y con Osetia del Sur.

""Pa Moscú ye un fechu consumáu que surdieron dos Estaos nuevos y preparó los acuerdos sobre l'establecimientu de les rellaciones diplomátiques"", indicó'l presidente rusu que más alantre van firmase otros acuerdos pa ""presta-yos ayuda económica, humanitaria y militar""."