Andecha homenaxa al Conseyu Soberanu d'Asturies y Lleón

Delantre’l monumentu llevantáu en Tarna que fai alcordanza de la declaración de soberanía proclamada'l 24 d’agostu del 1937.

"Artículul 1. El Conseyu Interprovincial d’Asturies y Lleón, a partir de la fecha y hora de la promulgación d’esti decretu, constitúise en Conseyu Soberanu de gobiernu en tol territoriu de la so xurisdición y a elli queden dafechamente sometíes toles xurisdiciones y organismos civiles y militares que funcionen o vaigan funcionar de secute dientru’l mentáu territoriu", citen dende Andecha Astur, organización qu'apunta qu'esti fechu permitió qu'Asturies entamara "un auténticu procesu revolucionariu y se defendiera heróicamente del exércitu facista español/italianu/alemán". 

Al respeuto, destaca que'l Conseyu Soberanu enxamás contó "cola aprobación de la República española, que llegó a considerar un alliviu l’acupación d’Asturies poles tropes facistes". "Frente al papel de la izquierda española n’Asturies, asumiendo l’agresión a la dignidá y la soberanía asturiana que supón el 'Principado' impuestu, Andecha Astur reclama’l Conseyu Soberanu como la última institución democrática del pueblu asturianu, y la soberanía como un drechu inrenunciable imprescindible p’afitar el nuesu futuru como pueblu", afirma la organización nacionalista.

L'actu d'homenaxe polos 80 años de la firma del decretu de constitución de la institución presidida por Berlamino Tomás va tener llugar el domingu a les 13.30 hores.