FADE propón un paquete de midíes complementaries al Aceba, ente les que s'incluyen rebaxes fiscales

" La Federación Asturiana d'Empresarios, Fade, entregó güei un paquete de 44 propuestes complementaries a les recoyíes nel Acuerdu pa la Competitividá, l'Emplegu y el Bienestar social 2008-2011, Aceba, agrupaes en siete bloques y que tien como oxetivu tanto estimular la ufierta como meyor garantía de caltener la creación de riqueza y l'emplegu. Ente eses propuestes tán midíes fiscales que pasen pela eliminación o baxada de dalgunos impuestos.

Según esplicó en rueda prensa'l presidente de la Fade, Severino García Vigón, los bloques nos que s'estructuren les propuestes son la financiación, el puxu a la inversión, el control y la eficiencia del gastu públicu, el mercáu llaboral, la política fiscal y la meyora de la competitividá.

Asina, Vigón se refirió a la necesidá d'eliminar dalgunos impuestos como'l de Sucesiones y Donaciones, qu'al so xuiciu ""nun fomenta l'aforru, y la so situación actual implica un agraviu comparativu con otres rexones del país"".

Tamién destacó la necesidá d'eliminar el llamáu ""céntimu sanitariu"", asina como amenorgar el tipu impositivu del Impuestu sobre actos xurídicos documentaos, amás d'establecer deducciones autonómiques qu'eliminen l'actual agraviu comparativu con otres comunidaes que valgan p'apoyar específicamente l'actividá económica.

Sobre esti asuntu, el cabezaleru d'UXT, Justo Rodríguez Braga, indicó qu'una reducción d'impuestos ""diba ser fatal"" na situación económica actual, mientres que'l secretariu de CC.OO, Antonio Pino, recordó qu'esti asuntu ""nun ta incluyíu nel Aceba y poro nun va podeer ser discutíu nesi marcu"".

Nes midíes propuestes, qu'agora deberán ser estudiaes pol Gobiernu, Fade tamién recueye l'ampliación de les actuaciones en materia de financiación y avales de la Sociedá Rexonal de Promoción, SRP y Asturgar, dando accesu a la mesma a otru tipu de proyeutos non contemplaos nesti momentu.

Amás, propónse crear una nueva lllinia de microcreitos pa Pymes que tán nuna situación delicada, pero tengan potencial a mediu plazu.

Dientro de la batería de propuestes pa controlar el gastu públicu, Fade apuesta por llendar al 2% el crecimientu de los capítulos de gastu corriente nos presupuestos pal 2009, asina como una revisión de la denominada 'carrera profesional' del personal públicu, pa que realmente suponga una meyora de la so productividá y non una simple subida xeneralizada."