Catorce conceyos sumáronse yá al Pactu Social contra la Violencia sobre les Muyeres
|
11 Agostu, 2017 por Redacción
Asturies rexistró nel primer semestre 1.163 casos de maltratu machista con siguimientu, de los que 504 riquieron amparu policial.
Catorce conceyos asturianos xuntáronse yá al Pactu Social contra la Violencia sobre les Muyeres impulsáu pol Gobiernu del Principáu. El Conceyu de Llaviana foi'l postreru en sumase a esta iniciativa con un proyectu qu'integra 28 acciones en materia de sensibilización, educación, prevención, protección y atención integral a les víctimes de malos tratos, una decisión que lu convierte nun conceyu “más igualitariu, más llibre y más seguru”, destacó'l conseyeru de Presidencia y Participación Ciudadana, Guillermo Martínez.
El titular de Presidencia estimó'l compromisu espresu del alcalde, Adrián Barbón, y de les asociaciones y entidaes del Conseyu de Muyeres de Llaviana, que plantegaron una fueya de ruta con oxetivos firmes y definíos, y animólos a llevar el plan “a cada rincón del conceyu”.
“Llaviana siempre foi un bon aliáu del Gobiernu d'Asturies na llucha contra'l maltratu y a favor de cualquier iniciativa qu'ayude a defender los derechos de les muyeres”, valoró. El conseyeru resaltó como exemplos d'esa implicación la Casa d'Alcuentru de les Muyeres, que dende 2006 realiza xornaes de coeducación, y el Tren de la Llibertá, que foi “una de les máximes espresiones y movilizaciones a favor de la igualdá”.
Dende la puesta en marcha del Pactu Social contra la Violencia sobre les Muyeres el 21 de xunetu de 2016, un total de 46 entidaes y más d'un centenar de persones a títulu individual suscribieron, dende distintos puntos de la comunidá, un compromisu que refuerza les polítiques pa erradicar la violencia de xéneru.
Los conceyos que s'incorporaron a l'alianza son los de Cangas, Carreño, Castropol, El Franco, Xixón, Llaviana, Mieres, Uviéu, Ponga, Pravia, Siero, Sotu'l Barcu, Tapia y Tinéu.
El pactu inclúi 150 midíes con un presupuestu de 8,9 millones pal so desenvolvimientu hasta 2019. Dica agora, impulsáronse 131 d'elles, que representen un 87% del total y supunxeron xuna inversión de 2,7 millones. Eses acciones estrémense en cuatro exes d'intervención: sensibilización y prevención, atención integral a les víctimes, collaboración institucional y revisión pa la meyora continua.
Dalgunes de les actuaciones más destacaes son la puesta en marcha de campañes empobinaes a los mozos al traviés de les redes sociales, l'ampliación de los programes d'educación afeutivu-sexual a tolos centros educativos, la firma d'alcuerdos colos medios de comunicación, el diseñu de protocolos de respuesta interinstitucional en casos d'asesinatu y acosu sexual, l'asistencia xurídica gratuita pa los familiares de muyeres asesinaes y l'usu d'aplicaciones de móvil pa detectar les primeres señales de maltratu.
El conseyeru de Presidencia sorrayó que queden entá munchos retos pendientes n'España. N'Asturies nun se rexistró nenguna víctima mortal nel primer semestre. Nos primeres trés meses del añu, presentáronse na rexón 723 denuncies, un 12% más que nel mesmu periodu de 2016, cuando se rexistraron 645.
Na primer metá del añu contabilizáronse na rexón 1.163 casos de violencia de xéneru con siguimientu, d'ellos, 504 riquieron protección policial: trés casos de riesgu altu, 79 de riesgu mediu y 422 con riesgu baxu.
Efrén d'Andrés
