La reforma del Estatutu centra los actos reivindicativos pa esti 8 de setiembre

"La recién reforma del Estatutu d'autonomía pautada ente los dos partíos mayoritarios, PSOE y PP, marca'l discursu del asturianismu políticu pa estí día d'Asturies o día de la nación asturiana. IX-BA-LV, Unión Asturianista, Unidá Nacionalista Asturiana y Andecha Astur van celebrar dellos actos esti día.

Mientres nel conceyu de Samartín del Rei Aurelio van celebrase los actos institucionales, nesti ochu de setiembre IX-BA-LV, Unión Asturianista, Unidá Nacionalista Asturiana y Andecha Astur van celebrar distintos actos a lo llargo de la xeografía del país. Sicasí, caún buscó un llugar representativu pa cauna de les coaliciones o partíos, asitiando los sos actos en llugares onde tienen representación institucional, sacante Andecha Astur, que celebra la so tradicional manifestación n'Uviéu.

Asina, Izquierda Xunida-Bloque por Asturies-Los Verdes y Lliberación van celebrar los sos actos n'El Campu, capital del Conceyu de Casu, onde gobierna la coalición. Col lema ""Por un estatutu de primera, saca-yos la roxa"" van celebrar un actu políticu a les 12. Darréu d'ello habrá delles actuaciones musicales.

Pel so llau Unión Asturianista, xuntura del Partíu Asturianista y Unión Renovadora Asturiana, van aconceyar como yá ye tradiconal en Cangues, delantre de la estatua de Pelayo, onde van facer un actu políticu a les 13:30 hores. De siguío celebrarán una xinta asturianista en Casa Ricardo, en Sellañu (Ponga), onde va exercer d'anfitrión l'alcalde asturianista del conceyu.

Unidá Nacionalista Asturiana tamién buscó un llugar simbólicu pa celebrar per un llau l'ochu de setiembre y per otru pa facer la presentación en sociedá de la nueva coalición de la izquierda nacionalista. UNA va realizar el so actu políticu en Candás, onde tien representación municipal. Va ser a les 12.00 na sala polivalente col lema ""Col estatutu del PSOE y el PP, ellos ganen, Asturies pierde"". Darréu d'ello va celebrase una espicha.

Finalmente Andecha Astur organiza una manifestación n'Uviéu col eslogan ""Pola soberanía y el socialismu. ¡Queremos votalu¡"" en referencia a la campaña que tien la organización pidiendo un referendum sobre l'estatutu d'autonomía. Va salir a les 13 hores de la Estación de Renfe d'Uviéu."