CC.OO cifra en 30 les muertes n'accidente llaboral esti añu, cuatro menos qu'en tol 2007

"CC.OO cifró güei en trenta les muertes rexistraes n'accidente llaboral no que va d'añu n'Asturies, cuatro menos qu'en tol 2007. L'últimu accidente mortal rexistróse ayeri nuna nave en Granda (Siero).

Pa CC.OO ""disparáronse de manera alarmante les víctimes nel sector de la construcción"". Según el sindicatu, al marxe del mozu muertu ayeri, nos siete primeros meses del 2008, rexistrárense nel llugar de trabayu y ensin contar los 'in itinere' siete muertos nel sector de la construcción.

Nel mesmu periodu de tiempu del 2007 contabilizábense cuatro, y un añu enantes, nel 2006, dos, según datos sindicales. Poro, pa CC.OO ""ye mui grave qu'en malpenes dos años les víctimes morales nel sector de la construcción se multiplicaren casi por cuatro"".

Nun comunicáu, CC.OO recuerda que nesti momentu existen más mecanismos llegales que nunca pa combatir la siniestralidá llaboral, polo ""que ta fallando ye la prevención y la vixilancia"". CC.OO d'Asturies alerta amás de que nun contestu d'amenorgamientu económicu xeneral, y de crisis y incrementu del desemplegu nel sector de la construcción ""cuérrese'l peligru de dexar de dar prioridá a la seguridá y la salú de los trabayadores""."