Principáu y Conceyu d'Uviéu vuelven enfrentase pola reforma y financiación del Teatru Campoamor

"La conseyera de Cultura y Turismu del Principáu d'Asturies, Encarnación Rodríguez Cañas, y el conceyal del Conceyu d'Uviéu, José Suárez Arias Cachero, volvieron güei a enfrentase pola financiación y la reforma del Teatru Campoamor. La polémica surdió cuando'l presidente de l'Asociación d'Amigos de la Ópera, Jaime Martínez, reclamó un ""esfuerzu"" pal escenariu escénicu y plantegó que ""falta dalgo"" nel teatru.

Tres esta reclamación, l'edil uvieín señaló que'l teatru sevillanu de La Maestranza, con un sieglu menos d'existencia que'l Campoamor, yá foi oxetu de ""una reforma completa"". Una reforma que contó, según el conceyal, con aportación económica del Gobiernu andaluz. ""Uviéu sólo pide un tratu asemeyáu"", reclamó Arias Cachero, tres la presentación de la nueva temporada operística.

Estes exixencies algamaron respuesta de la titular de cultura, que señaló que, de facese una reforma na caxa escénica, eso tendría consecuencies pa les primeres files. ""Igual eso fuera en detrimentu de les primeres butaques, que son les de los abonaos, creando asina una pequeña crisis"", aseguró.

Nesti sen, Rodríguez Cañas recordó qu'hai un añu caltuvo un alcuentru col conceyal nel qu'ésti mostró-y una semeya cola recreación de la posible ampliación de la caxa escénica. ""Pero un proyeutu seriu y rigurosu ye muncho más; tenemos que ser rigurosos"", criticó.

Asina, la conseyera comentó que ""a lo meyor"", y coincidiendo cola posible capitalidá europea del 2016 podría falar d'esa ampliación. ""Pero hai qu'estudialo, amás tamos nuna situación na que se mos pide austeridá"", declaró.

FINANCIACIÓN

Pero les crítiques del conceyal 'popular' nun sólo quedaron na reforma del teatru, sinón que tamién se dirixeron a la financiación del mesmu. Nesi aspeutu, l'edil declaró confiar en que se ""piesllen les resquiebres"" de la financiación ente Uviéu y otres ciudaes con teatros d'asemeyaes característiques, en concreto con Bilbao. ""Que se cumpla aquello que se dixo"", exixó.

Arias Cachero tamién se refirió al incrementu de l'aportación presupuestaria del Principáu al Campoamor. Asina, l'edil reconoció que, anque ésta aumentó nun 50 por cientu, l'actual situación de prollongación torgó qu'esi incrementu s'efeutuare.

""Sí existe una voluntá d'aumentar l'aportación, pero nun se materializó"", recordó l'edil, quien añadió que dende'l Conceyu sólo esperen qu'esi incrementu s'aporte esti añu.

Nesti sen, Rodríguez Cañas aseguró que, si bien nun se pudo materializar esi incrementu en 360.000 euros, sí s'aportó lo presupuestao nel 2007, ye dicir, unos 240.000 euros.

A lo cabero, la conseyera tamién destacó que l'aportación del Ministeriu de Cultura incrementóse nun 80 por cientu. ""Ye un aumentu más que notable, sobresaliente"", aseguró."