Asociaciones d'inmigrantes dicen tar "bastante preocupaos" pola posible reducción de contratación n'orixe

"El voceru de l'Asociación d'Inmigrantes Ecuatorianos Rumiñahui, Raúl Jiménez, mostróse güei ""sorprendíu y bastante preocupáu"" pola midida qu'anunció ayeri'l ministru de Trabayu y Inmigración, Celestino Corbacho, d'amenorgar considerablemente les contrataciones n'orixe y alvirtió de qu'esta postura ta a la escontra de los acuertos billaterales de regulación de fluxos migratorios con países como Ecuador, Colombia o Marruecos.

En declaraciones a Europa Press Televisión, el voceru señaló que la reaición de tolos sectores sociales y el propiu gobiernu n'Ecuador a esti anunciu foi ""drástica"". ""La ministra de rellaciones esteriores d'Ecuador llevantó la so voz de protesta porque nun entiende cómo Europa ta pesllando les sos puertes a los que necesiten buscase la vida"", apuntó.

Nesti sen, Jiménez indicó que la imaxe que'l Gobiernu español prentede dar de los inmigrantes ye que son ""los culpables del paru"", y que necesiten los puestos de trabayu los españoles, cuando, al so xuiciu, los sos compatriotes desarrollen oficios que los españoles refuguen.

""Los empressarios españoles nun atopen trabayadores pa los puestos de difícil cobertoria, el problema ye qu'un español nun aceptaría'l trabayu d'un camareru con xornada de doce hores. Paez que'l Gobiernu va obligar a los paraos a aceptar estes profesiones pero un arquiteutu desemplegáu nun va ponese a recoyer freses"", criticó.

Sobre la mesa de diálogu social que caltuvo'l titular de trabayu colos sindicatos el pasáu miércoles, Jiménez aseguró que ""nunca se faló"" de recortar la contratación d'inmigrantes y poro reconoció que los representantes sindicales ""tán mui molestos"".

P'acabar reivindicó la participación de les asociaciones d'inmigrantes nes próximes meses de diálogu social yá que son ""los más comprometíos"". ""Pidimos la participación pero llamentablemente nunca mos conviden"", acabó."