El Gobiernu concede la medaya d’oru del país a Plácido Arango

El Conseyu de Gobiernu decidió esti miércoles les medayes d’Asturies qu’entrega coincidiendo col 8 de setiembre pa premiar méritos de persones o coleutivos. Nesta ocasión la medaya d’oru va ser pal empresariu mexicanu d’orixe asturianu Plácido Arango.

“Va recibir la Medaya d’Asturies, na su categoría d’oru, pola so reconocida trayeutoria profesional, social y cultural, amás del so singular venceyu col Principáu, que quedó de manifiesto a lo llargo del so itinerariu vital y, especialmente, en momentos importantes de la historia reciente de la comunidá. Destaquen, por exemplu, el so llabor na presidencia de la Fundación Príncipe de Asturias mientres los años de la espansión internacional de los premios y el so esmolecimientu por apoyar y impulsar el Muséu de Belles Artes d’Asturies cola valiosa donación d’obres d’arte de la so coleición particular”, apunten nuna nota dende l’Executivu.

La Xunidá Canina de Rescate del Principáu; l’ex presidente de la Confederación Española de Personas con Discapacidad Física y Orgánica (Cocemfe), Mario García Sánchez; y la rede de centros y profesionales d’Atención Primaria del Serviciu de Salú del Principáu (Sespa) van llevar, mentes, la medaya de plata.

Na semeya, los gallardonaos nel 2016 xunto col presidente Javier Fernández. Autor: Armando Álvarez.