Cientos d'afganos exixen castigu pa los culpables de la muerte de 90

Cientos d'afganos axuntáronse cerca d'una llocalidá bombardiada pola coalición encabezada por EE.UU pa pidir al Gobiernu que se castigue a los responsables de la muerte de polo menos 90 civiles en dicha operación.

Según el Gobiernu afganu, más de 90 persones, na so mayoría muyeres y neños, morrieron el pasáu 22 d'agostu nel distritu de Shindand, na provincia de Herat (oeste), acusación qu'apoyó la ONU: l'Exércitu estaounidense afirma que la so investigación reveló qu'ente cinco y siete civiles morrieron, amás d'ente 30 y 35 supuestos talibanes.

""Nun había nengún talibán na zona, nun tengo nin siquier un arma en casa"", afirma Sayed Ahmad, que perdió a la so muyer y dos fíos nel ataque. ""Queremos que'l presidente Karzai y el Gobiernu castiguen a los culpables"", añadió.

Karzai indicó que faló col presidente estaounidense, George W. Bush, sobre l'incidente ayeri y qu'ésti espresó-y el so pesar. El presidente afganu, que s'aconceyó con familiares de les víctimes cerca del aeropuertu en Shindand, posteriormente foi a la llocalidá onde se produxo l'ataque.

Gul Ahmad, en representación d'unes miles persones, dixo que la información falsa sobre la presencia de talibanes na zona foi alimentada poles fuerces de la coalición, lo que llevó al bombardéu. ""Queremos qu'eses persones seyan castigaes"", aseguró.

L'Exércitu estaounidense dixo que la so investigación de la operación en Shindand detectó qu'un importante comandante talibán figurada ente los 30 o 35 supuestos insurxentes muertos. Según esta fonte, l'ataque aereu ordenóse dempués de que fuerces afganes y de la coalición fueren disparaes demientres una ofensiva na zona de Shindand.

Según l'Exércitu norteamericanu, los talibán prevíen atacar una base cerca de la coalición. L'Exércitu ofreció una investigación a tres bandes sobre la muerte de civiles, a la que dio'l so vistu bonu'l Gobiernu afganu. Nella tamién van participar la ONU.

Más de 500 civiles morrieron demientres operaciones de les fuerces estranxeres y afganes escontra los milicianos no que va d'añu, según el Gobiernu afganu y dellos grupos humanitarios."