Los "renovadores" del PP asturianu trabayen nuna candidatura

"Dirixentes y afiliaos del PP d'Asturies, qu'integren un grupu nel que se definen como ""renovadores"", tán trabayando estos díes en diferentes conceyos pa formar una candidatura ""solvente"" de cara al próximu Congresu rexonal del partíu.

Trátase d'una candidatura que nun tien nada que ver cola que podría encabezar l'ex voceru parlamentariu, Juan Morales, quien sigue tovía estudiando si asume esta responsabilidá pa disputar tamién la presidencia al sector oficial lideráu por Ovidio Sánchez, según fontes del PP consultaes por Europa Press. Ayeri mismo, Morales aconceyóse con distintos militantes del partíu y representantes de Xuntes.

Perfílense asina tres opciones de cara a la cita congresual del partíu, que se va celebrar previsiblemente en payares: la ""oficial"", la ""crítica"" y la ""renovadora"".

Sin embargu, militantes del denomináu grupu de ""renovadores"" esclariaron que la opción ye distinta a la de los ""críticos"", en referencia a la hipotética candidatura de Morales.

Asina, estos 'renovadores', señalaron que la postura nun ye ""crítica"", sinón que busca en tou momentu la ""renovación"" del partíu, na llinia de la direición nacional del PP de Mariano Rajoy y de lo que yá apuntó nel so día la ex diputada nacional Alicia Castro.

""Tamos cola inmensa mayoría que quier un cambiu nel PP d'Asturies pol bien de toos, nun sobra naide"", señaló ún de los dirixentes 'populares' qu'integren esta corriente nel senu del partíu, qu'añadió que yá cuenten col apoyu de dalgunes de les principales xuntes llocales de la formación, como Xixón, Mieres o Llanes. Nesti grupu tamién diben tar integraos diputaos rexonales como Luis Peláez o Emilio Rodríguez.

Esplicaron amás que'l so trabayu básase nel desarrolláu pola direición nacional del PP, encabezada por Mariano Rajoy. ""Trátase d'una renovación consensuada y con rigor, de la manera menos traumática, en coordinación con Madrid y qu'aconceye a toles tendencies del partíu"", señalaron.

Ensin entrar amás en nenguna polémica sobre'l grupu de Morales, los 'renovadores' sí mostraron cierta sorpresa ante'l ""apoyu"" que da l'actual secretariu xeneral del partíu, Reinerio Álvarez, al grupu que se ta aconceyando estos díes con Juan Morales.

El Congresu rexonal del PP va celebrase a mediaos de payares, colo que se calcula que la xunta del partíu que lu convoque se celebre a primeros d'ochobre."