Alcaldía rectifica nel vetu a la XDLA nel Festival Arcu Atlánticu

Carmen Moriyón, alcaldesa de Xixón, aconceyó esti martes con representantes de la Xunta pola Defensa de la Llingua Asturiana (XDLA) y reconoció que la presentación del ‘Proyectu 2018 pa la Oficialidá’ sí tenía cabida nel Arcu Atlánticu. El Conceyu de Xixón ufre la so disponibilidá pa facelo definitivamente en setiembre.

Ayeri celebróse previamente un conceyu con Ana Montserrat López Moro, conceyala d’Educación y Cultura, y Raquel Huergo, direutora de la Fundación Municipal de Cultura, Educación y Universidá Popular, que “foi realmente insatisfactoria”, esplica Xosé Candel, de la XDLA. “Repitieron básicamente lo de la carta que nos unviaron,”, añade, ensin reconocer en nengún momentu l’error de l’actuación municipal.

Pese a la insistencia en buscar fórmules pa la participación de la XDLA nesta edición certame, el coleutivu cívicu afitóse na so postura inicial de nun modificar la idea inicial de la charra y, poro, nun tomar parte nesta edición dedicada a les llingües minorizaes. Tiempu depués de la reunión, la organización recibiría una llamada pa celebrar un conceyu esta mañana con Moriyón, que presentó una actitú diferente.

“Reconoció que la charra sí tenía cabida nel Arcu Atlánticu y que podía desendolcase tal y como taba preparada. Valoramos la so bona disposición y al final vino a danos la razón”, señala Candel. L’alternativa, dada la imposibilidá de buscar una salida digna al ‘Proyectu 2018 pa la Oficialidá’ nel Arcu Atlánticu, foi la ceder un espaciu municipal pa dar a conocer esta iniciativa nos meses próximos, con casi toda seguridá en setiembre.

Mañana, la XDLA va dar una valoración sobre estos acontecimientos.

Xixón Sí Puede celebra la rectificación

“La XDLA presentó una propuesta totalmente compatible cola temática del festival, les llingües minorizaes, polo que pretender marcar dende la Conceyalía de Cultura lo qu'esta organización pue dicir o nun dicir ta dafechu fuera de sitiu y más cuando se fala de 'politización' d'un asuntu que ta en sí politizáu pol estatus de les propies llingües minorizaes. Nestos díes nel Festival vamos sintir estremaos discursos sobre la situación de bien de llingües minorizaes n'Europa, polo que nun s'entiende que se quiera negar abordar esta cuestión n'Asturies”, declaró Mario Suárez del Fueyo, voceru de Xixón Sí Puede, tres conocer el cambiu d’actitú de Foro. La candidatura de xunidá popular posicionárase tres la polémica a favor de la XDLA y anunciara que se desmarcaba del certame nel casu de que nun hubiera rectificación por parte del equipu de gobiernu.