El Principáu ye la comunidá con menor fracasu escolar

"El fracasu escolar n'España queda nel 30,8 por cientu tres crecer casi un 16 por cientu dende'l 2000, fecha hasta la que se tienen datos, y un 8 por cientu nos últimos dos años, según un artículu de la revista 'Magisterio', recoyíu por Europa Press. Asturies ye la comunidá con menor fracasu escolar.

Esti fenómenu, qu'afeuta ya a 135.000 mozos al añu, distribúyese de manera distinta poles diferentes comunidaes autónomes y afeuta hasta un 14 por cientu más a los homes (37,6%) qu'a les muyeres (23,6%).

Les comunidaes con mayor fracasu son Ceuta (52%), Comunidá Valenciana (39,7%), Baleares (38%) y Melilla (37,5%). Les que menos, Asturies (16,5%) y País Vascu (17%), sigúies por Navarra (22,3%), Cantabria (22,4%) y Castiella y Llión (22,5), según datos del 2006 ellaboraos de magar estadístiques del Ministeriu d'Educación, Política social y Deporte y del Institutu Nacional d'Estadística (INE).

La peor evolución la rexistren la Comunidá Valenciana (con un aumentu de 14,4 puntos más dende'l 2000 al 2006), Andalucía (con 7,3 puntos más), Ceuta y Aragón (con 4,5 puntos), que son les úniques comunidaes que tán penriba de la evolución media española (4,2 puntos).

Per contra, Melilla, que baxó'l so fracasu escolar un 10,2 por cientu ente'l 2000 y el 2006, Murcia, que lu reduxo nesi periodu de tiempu un 3,1 por cientu y Cantabria, con una baxada del 1,4 por cientu, rexistren los meyores datos.

EVOLUCIÓN NUN AÑU.

Del 2005 al 2006, Navarra empeoró cuatro puntos; la Comunidá Valenciana, 3,9; Castiella La Mancha, 3,4; Aragón 3,3; Madrid, 3,1; Ceuta, 1,9; Asturies, 1,7; Castiella y Llión, 1,5; Galicia, 1,2; Canaries, 0,8; País Vascu, 0,4; y La Rioxa, 0,2.

Nesi añu, Baleares foi la única comunidá que se caltuvo, mientres que les que meyoraron fueron: Melilla (4,8%), Andalucía (0,8%), Cantabria (0,6%) y Estremadura (0,4%).

Por sexos, 14 puntos separen el 37,6 por cientu de fracasu de los mozos del 23,6 por cientu de les moces. Amás, nueve comunidaes tienen un fracasu escolar masculín penriba del 40 por cientu, mientres que sólo cuatro tienen un fracasu escolar femenín penriba del 30 por cientu."