CC.OO estima que nun añu morrieron nel Principáu 321 trabayadores por mor de cáncer llaboral

"El sindicatu CC.OO calcula que n'España cinco millones de trabayadores tán espuestos a axentes canceríxenos, un 25% de la población llaboral española, col resultáu estimáu d'ente 3.000 y 15.000 nuevos casos de cáncer llaboral al añu, y ente 2.000 y 9.000 muertes por cáncer d'orixe llaboral. Munchos pa nun tenese en cuenta, sobre too si consideramos que toos puen prevenise. N'Asturies, el sindicatu estima que morrieron 321 trabayadores a causa del cáncer llaboral.

Al traviés d'una nota de prensa, CC.OO llamentó que n'Asturies nun existan datos oficiales porque nun consta nenguna muerte por esta causa. Les enfermedaes profesionales nun se rexistren, y muncho menos el cáncer llaboral. Sin embargu, señalaron qu'un estudiu realizáu pol Institutu de Trabayu, Ambiente y Salú (Istas) de CC.OO estima que n'Asturies morrieron sólo nun añu (2005) pola mor d'enfermedaes profesionales 543 trabayadores, de los que 321 fueron a causa del cáncer llaboral, y 106 pola mor del aparatu circulatoriu.

Con añu y mediu d'andadura del Real Decretu d'Enfermedaes Profesionales, según CC.OO, ""nun sólo meyoraron el rexistru de les enfermedaes, sinón que cayó en picáu: tamos, otra vuelta, anclaos na 'infradeclaración'"".

CC.OO alertó que pa los trabayadores, el cáncer llaboral ye un peligru invisible y les consecuencies nun son inmediates como nos accidentes de trabayu. ""De fechu, hai cánceres que tienen un periodu llatente ente 20 y 50 años dempués de la esposición al axente canceríxenu"", señalaron."