L'Executivu prepara un plan de meyores nos cinco parques naturales

Va centrase nes infraestructures ganaderes y na adecuación y señalización de siendes y otros espacios d'usu públicu.

La conseyera de Desarrollu Rural y Recursos Naturales, María Jesús Álvarez González, anunció güei que'l Gobiernu trabaya nun cambiu presupuestariu que va xubir 500.000 euros la partida destinada a los parques naturales del país. Los fondos van emplegáse nos diez conceyos onde s'alluguen los cinco espacios protexíos.

Na reunión de la xunta rectora del Parque Natural de Penubina-La Mesa, celebrada na tarde d'ayeri, Álvarez destacó que'l Gobiernu tien programaes inversiones pal área por un valor de 200.000 euros hasta final d'añu, de los que casi 150.000 van dedicase a la meyora d'infraestructures nel mediu rural. Ta prevista la realización de dos talos proyectos de meyora de caminos d'usu ganaderu en Rospaso (Ḷḷena) y en La Torre (Teberga), mesmo qu’un proyeutu de meyora nes conducciones d'agua nel pueblu de Fresnéu de Quirós.

Respeuto al usu públicu del espaciu, van facese numberoses obres de señalización de percorríos turísticos, destacando la continuación nes obres de caltenimientu y ameyora que la Direición de Recursos Naturales ta realizando nos últimos años mesmo na Sienda del Osu como nel Camín de Santiago al so pasu pel parque natural.

Tramitación tres el branu de la revisión

Álvarez presentó na reunión la memoria del Parque Natural de Penubina-La Mesa del añu pasáu y sorrayó que'l Gobiernu fixo una inversión “bien importante” nel espaciu protexíu nel 2016: un total de 4,5 millones, lo que supon un gastu de casi 1.700 euros per habitante. Per otru llau, la revisión de la nueva memoria económica del instrumentu de xestión del espaciu protexíu, empecipiada tres la so anulación por sentencia xudicial, atópase práuticamente rematada tres un analís rigorosu de les llendes qu'establez, del so algame y de los impautos económicos que producen, polo que se prevé que la so tramitación pueda empezar tres el branu.