L’Arcu Atlánticu veta una charra de la XDLA por considerala política

La Fundación Municipal de Cultura treslladó a la XDLA la so negativa a programar nel Festival Arcu Atlánticu una presentación de la so iniciativa ‘Proyectu 2018’ por considerala “mui venceyada a la política”. Esti añu’l certame ta dedicáu a les llingües minoritaries.

El ‘Proyectu 2018 pa la Oficialidá’, dao a conocer públicamente nel Día de les Lletres Asturianes, busca poner en marcha una reforma estatutaria al traviés del Artículu 56.1 al contar col compromisu de más de los diputaos necesarios pa ponelu en marcha, esto ye, 12. La intención de la Xunta pola Defensa de la Llingua Asturiana (XDLA) yera aprovechar la posibilidá que l’Arcu Atlánticu daba a coleutivos pa facer actividaes mientres esta edición, que lleva’l nome de ‘Un mar de llingües’, pa siguir esponiendo esta iniciativa, dalgo que la organización del certame refugó al considerala política.

“La primer de les actividaes que nos plantegáis abúltanos que nun encaxa bien cola filosofía del Arcu Atlánticu: ye una visión del fechu llingüísticu mui venceyada a la política, que desdibuxa la idea de Festival na que venimos trabayando na primer edición”, respondió a la XDLA per carta Raquel Huergo, direutora de la Fundación Municipal de Cultura, Educación y Universidá Popular. Nesi sen apunta que la idea ye dar a conocer la situación del idioma “dende un puntu de vista más divulgativu, un poco más alloñáu de la vindicación nel sentíu estrictu”, y afala al coleutivu a da-y una vuelta a la charra.

“Pa la XDLA ye intolerable que dende una institución pública como la Fundación Municipal de Cultura se censure y se vete a asociaciones, reflexando prexuicios y sesgos políticos represores. Y ye que la politización ye la de los organizadores, que non solo quieren tapecer la realidá na que sobrevive la llingua asturiana (a xixoneses y foráneos), sinón que tienen el valor de pidir a una organización social que modifique una presentación”, denuncia’l coleutivu cívicu, que tamién solicitar colocara un puestín con material nel que s’esplicara’l so llabor, dalgo a lo que sí accedió la organización siempre que nun valiera “como implementación del conteníu meramente políticu de la primera”, apuntó Huergo.

Refugu a participar

Esta situación lleva a la XDLA a decidir non participar nel Arcu Atlánticu, un “festival que pretende poner en valir el patrimoniu cultural européu al traviés d'una escenificación vacia y ridícula”. D’igual forma anuncia que “vamos pidir responsabilidaes y el cese de los responsables que pretenden censurar y poner filtru a una entidá que lleva más de 30 años lluchando na cai pola oficialidá de la llingua asturiana, ensin más aditivos nin xuegos florales. Un sitiu, la cai, onde vamos siguir tando por muncho que-y cafie al Conceyu de Xixón, reivindicando qu'Asturies sía, sí, más abierta y más plural”.