Las Noches de La Cebera

La Fundación Municipal de Cultura de Siero entama una nueva edición de 'Las Noches de La Cebera', un ciclu de música y teatru que se va celebrar nesta área verde de Llugones n'horariu nocherniegu y con llume artificial.


Tratase d'un programa eclécticu nel qu'a les artes escéniques, van sumase'l folk, los fados y el pop-rock. Los actos van tener llugar del 31 de xunetu al 3 d'agostu, como antoxana a les Fiestes d'El Carbayu, que van empecipiar el vienres 4 d'agostu. Tolos actos van entamar a les 22.00 hores y l'entrada va ser gratuita, magar les localidaes d'asientu van tar llindaes.


Esta va ser la décima edición de 'Las Noches de La Cebera', programa cultural que respuende a una molición vecinal de la localidá. Les ediciones anteriores cerráronse con un notable ésitu de públicu. La Finca La Cebera ocupa una superficie de 300.000 metros cuadraos y na mesma fueron catalogaes más de 2.000 especies arbórees, lo que la convierte n'un de los principales pulmones verdes del centru d'Asturies. Pola so sonoridá y guapura, ufierta unes condiciones aparentes para acoyer espectáculos al campu.


Llunes 31 de xunetu: SALÓN BOMBÉ. Orquestina tradicional asturiana

Salón Bombé, naz a principios del añu 2016, col enfotu de recuperar les orquestines tradicionales asturianes y el soníu d'estes, que convidaben al baille tantu 'a lo suelto' como 'a lo agarrao'. Una nueva propuesta musical n'Asturies, partiendo de la base de gaita y tambor, sumándo-y acordión diatónicu, saxo, voz y un set de percusiónes. En 2016 participó nel Festival Intercélticu de Lorient.


Martes 1 d'agostu: NUECHE DEL FADO

En collaboración cola Asociación Amigos del Fado d'Asturies', la nueche del fado va averar al públicu fados tradicionales, música popular de Portugal. Milene Sofía (voz), Jorge Baptista (voz), Pedro Marques (guitarra portuguesa) y Miguel Monteiro (viola de fado), van movese dende Lisboa para dar a conocer el cantar popular urbanu de Portugal, reconocíu pola UNESCO como Patrimoniu Cultural Inmaterial de la Humanidá.


Miércoles 2 d'agostu: TEATRU ELECTRA. 'Les sardineres'

'Les Sardineres' ye una comedia de corte costumbrista asturianu compuesta por dos curtios. El primeru d'ellos ta protagonizáu por Serafa, (vendedora de zapatos), y por Pepa, una muyer peculiar. L'otru curtiu protagonizalu Telva y Ulogia dos sardineres de Cimavilla, que van al mercáu a vender. Ellí van ponese de manifiestu les sos diferencies pero, sobremanera, los chismes y hestories del barriu. El que más importa ye'l de Maruxa, sobrina de Ulogia, que ta metida nun bon enguedeyu.


Xueves 3 d'agostu: VINTAGE ÁSTUR BAND. Música de los 80

Grupu de recién creación, nacíu de los rescoldos d'una formación anterior llamada 'Vieja Banda'. Va Ufiertar una selección de temes musicales de los años 80, versionando cantares d'Al Bano, Eric Clapton, Joe Cocker, Ton Jones, Los Secretos, Miguel Ríos, Scorpions o Manolo Tena, ente otros. Los componentes d'esta banda son músicos que formaron parte de grupos asturianos de los años 80, como Sesta Avenida, Oro Negro, Orquesta Principado, Los Príncipes, Bio Ritmos o Los Movers, que siguen calteniendo l'actividá musical, por aciu l'estudiu y los ensayos.
Hora: 22:00h.