Deportes, danza, talleres y música conformen el menú del primer Festival de Cultura Urbano de Samartín, que va celebrase esti sábadu en L’Entregu dende primer hora de la mañana. L’Asociación Xuvenil Que Nun Apare! entama esti eventu “pa enllenar el vacíu cultural esistente –sobremanera pa la mocedá–” nel conceyu.
El términu ‘cultura urbano’ “refierse a aquelles actividaes que se faen na cai socialmente y con daqué arume alternativu”, según espliquen dende la organización. “Amás esti festival tamién nagua por apostar pola multicultularidá, amestando nel programa parte de la esencia de Xamaica, del Bronx y d'África; too ello ensin escaecer los raigaños culturales asturianos”, espliquen dende la organización, que destaca la presencia de danza africana, un pasucais de los Gaiteros del Carbón, una auténtica soundsystem –los potentes equipos musicales artesanales y portátiles que nacieron en Xamaica nos años 50–, un espectáculu de circu y conciertos hip hop y reggae con Dani Antistylo, Sebas SBS, K-Nalón, Guaja D y Allanái Soundsystem”, añaden.
El deporte va tener tamién un papel bien destacáu nesti festival, con un tornéu mestu de baloncestu, zona de skateboard y xuegos y deportes tradicionales asturianos. La pata educativa ye considerada fundamental pola organización del certame, polo que va haber tamién talleres de pintacares y globofexia, de graffitti y de risoterapia, amás d’una charra alrodiu la cultura soundsystem.
“A la fin, el I Festival de Cultura Urbano de Samartín va ser una montonera d'actividaes pa tolos públicos que van ufiertar daqué distinto al conceyu, apostando amás polos artistes y creadores asturianos y de la Cuenca’l Nalón. Una cita autoxestionada pola mocedá y desendolcada tamién gracies al sofitu de los vecinos y de los comerciantes de L’Entregu”, destaquen dende Que nun Apare!”. Tola programación va desendolcase nel Colexu Públicu El Coto dende les 10.30 hores de mañana hasta la 1 de la madrugada.
Adxuntu | Tamañu |
---|---|
![]() | 293.01 KB |
![]() | 5.28 MB |