Braga (UXT) pide un pactu de Gobiernu rexonal d'izquierdes porque "Asturies nun ta pa prollongaciones presupuestaries"

"El secretariu xeneral d'UXT, Justo Rodríguez Braga, apelló güei a la ""responsabilidá"" de los dos partíos d'izquierdes con representación na Xunta Xeneral del Principáu, PSOE y IX-BA-LV, col propósitu d'algamar un acuerdu de Gobiernu que permita dar estabilidá a los presupuestos de los próximos años porque ""Asturies nun ta pa prollongaciones presupuestaries"".

Asina, caltuvo que dambos partíos, que yá formaron equipu de Gobiernu na anterior llexislatura, vean los elementos que los unen, dean posibilidaes d'acuerdu y aparquen los temes de conflictu, como la presa de Caliao, la incineradora de Serín o la cooficialidá del asturianu.

Rodríguez Braga fizo asina un pidimientu direutu al grupu d'Izquierda Xunida pa que pase d'una postura ""ideolóxica"" a una ""pragmática"", ya qu'entiende que les principales preocupaciones de los asturianos se dirixen hacia l'emplegu dignu, el salariu apropiáu y la vivienda accesible y protexida.

Según el dirixente, ye necesario qu'una izquierda plural facilite la mayoría y garantice unos presupuestos que permitan afrontar y meyorar la situación. Nesti sen, afirmó que ""ye posible un presupuestu ambiciosu"".

El responsable de la organización sindical n'Asturies fizo'l so pidimientu en declaración ante los medios de comunicación, nel marcu de la presentación de la Escuela Internacional de branu d'UXT que va inaugurase oficialmente esta tarde de magar les 17.00 hores, nel Antiguu Institutu de Xixón. Al actu van asistir tamién el presidente del Principáu, Vicente Álvarez Areces, l'alcaldesa de Xixón, Paz Fernández Felgueroso, y el rector de la Universidá d'Uviéu, Vicente Gotor, ente otres personalidaes.

REVISIÓN DEL ACEBA

Per otra parte, pero tamién nel ámbitu del desarrollu económicu y social de la comunidá, el secretariu xeneral d'UXT dixo apostar pola revisión del vixente acuerdu social 'Aceba', porque considera que dende la so aprobación, hai unos ocho meses, hasta la fecha actual, la situación cambió. Esta prevista una xunta ente Gobiernu, sindicatos y patronal, pa la próxima selmana, según dixo'l dirixente sindical. D'esta manera, señala que la revisión del documentu va poder meyorar y orientar les midíes que contién ante l'actual crisis económica.

La situación asturiana ye meyor que la del restu del país, reconoció Rodríguez Braga, anque señaló en qu'hai qu'adelantar dalgunes de les midíes del Aceba, como les inversiones n'infraestructures, reforzar el sistema productivu, la I+D+i, y la industria, asina como afondar en midíes de proteición social pa meyorar la competitividá, y el bienestar social de la comunidá.

Tamién señaló nun tar d'acuerdu colos resultaos de la sanidá pública nel Principáu, que dixo ""tien de meyorar"" porque considera que l'alta valoración cuidadana que recibe ye ""ficticia"". ""Munchos asturianos van a la sanidá privada"", llamentó Rodríguez Braga, qu'entiende qu'esta derivación débese a les llargues llistes d'espera del serviciu de salú asturianu. De la mesma manera, remarcó qu'en munchos casos son los propios profesionales de la sanidá pública los que los atienden na sanidá privada.

SINIESTRALIDÁ LLABORAL

Por último, el secretariu xeneral d'UXT n'Asturies trató la siniestralidá llaboral nel Principáu, señalando que'l sindicatu fai propuestes p'amenorgar esti problema al traviés del Institutu de Riesgos Llaborales. Destacó, de la mesma manera, la importancia que tien sobre les midíes de prevención y control aprobaes por consensu nel marcu del Aceba.

A nivel nacional, recordó que ta en marcha la Llei Integral de Prevención de Riesgos Llaborales, y calcó na apuesta d'UXT por reforzar la Inspeición de Trabayu; la especialización policial pa delitos nel ámbitu llaboral; la formación en prevención d'emplegaos y empresarios; asina como l'esfuerzu por facer cumplir la llei con ""responsabilidá""."