El preciu de la vivienda baxó n'Asturies en branu un 0,21 por cientu,

"El preciu de la vivienda n'España baxó un 1,52% demientres los meses braniegos del 2008 (dende'l 1 de xunu hasta'l 31 d'agostu) y acumuló una baxada de 5,11% dende l'entamu del añu, según 'El Preciómetro', l'índiz de precios del portal inmobiliariu y de la vivienda Facilisimo.com. N'Asturies, el descensu foi del 0,21 por cientu.

Sicasí, y al marxe de la tónica dominante, Galicia (+0,98%), Estremadura (+0,93%) y Cantabria (+0,25%) fueron les úniques rexones onde la vivienda s'encareció demientres el periodu estival.

A nivel nacional, el preciu mediu del metru cuadráu quedó en 2.340 euros demientres el branu, mientres qu'hai un añu costaba 170 euros más, ye dicir, 2.510 euros por metru.

Según Facilisimo.com, el branu entamó con una moderación na baxada del preciu de la vivienda (dende'l -1,04% de mayu hasta'l -0,67% en xunu y el -0,38% en xunetu), anque agostu frayó esta tendencia y rexistró una cayida del 0,43%, pesllando'l periodu con un acumuláu del 1,52%, frente al descensu del 0,28% rexistráu l'ñau pasáu, época en qu'entamó la cayida de precios de la vivienda.

Por comunidaes autónomes, Baleares, Murcia y Castiella La Mancha rexistraron los mayores descensos nos precios demientres los tres meses de branu, con cayíes del 7,25%, 2,68% y del 2,51%, caúna.

Siguiéronles Aragón (-2,43%), Castiella y Llión (-2,24%), Madrid (-1,81%), Cataluña (-1,63%), La Rioxa (-1,57%), Comunidá Valenciana (-1,53%), Navarra (-1,45%), Isles Canaries (-0,98%), Andalucía (0,87%), Asturies (-0,21%) y País Vascu (0,11%).

Si se tienen en cuenta los datos mensuales, correspondientes al mes d'agostu, la tendencia baxista de los precios de la vivienda foi común en casi toles comunidaes autónomes, ya que los precios cayeron en toes, menos en La Rioxa, País Vascu, Castiella-La Mancha, Galicia, Estremadura y Asturies.

Pal direutor d'operaciones de Facilisimo.com, Juanra Doral, la inactividá habitual de la época braniega, agravada pola situación actual, aceleró'l zarru de bastantes inmobiliaries, anque, al so paecer, el mes de setiembre pue suponer l'entamu de la estabilidá, siempre dependencido del Euríbor y de la política bancaria de concesión d'hipoteques.

'El Preciómetru' ye una ferramienta d'análisis de precios inmobiliarios creada por Facilisimo.com, qu'analiza una muestra de más de 100.000 inmuebles de segunda mano de toa España diariamente, incluyendo una segmentación por comunidaes autónomes, provincies, poblaciones y zones de les ciudaes pa estudiar les variaciones del preciu de la vivienda a tiempu real."