La evacuación de Nueva Orleans colapsa les carreteres, mientres 'Gustav' sigue siendo de categoría 3

"Decenes de miles de persones en Nueva Orleans y la costa estaounidense del Golfu de México fuxeron el domingu de les sos cases mientres l'huracán 'Gustav' taba a puntu de tocar tierra, posiblemente con una fuerza menor de la que tuvo nel 2005 el Katrina. La industria petrolera dende Texas a Nueva Orleans tampoco quiso arriesgase y peslló casi toles plataformes en mar abiertu y delles refineríes.

Dende que l'alcalde de Nueva Orleans, Ray Nagin, anunciare la orde d'evacuación obligatoria a los 329.000 habitantes de la ciudá, los vehículos bloquiaron les carretres, anque nun se produxo nengún incidente. Nagin llanzó un mensaxe a los residentes: ""ésta ye la madre de toles tormentes, una tormenta grande y peligrosa que caltién la so fuerza, polo que los encamento a colar"".

L'alcalde impunxo un toque de queda dende l'atardecer al alborecer y alvirtió a los saquiadores que van ser unviaos direutamente a prisión. Nagin tamién alvirtió de que cualquiera que desafíe les ordes d'evacuación va enfrentase a un peligru estremu. Les cases móviles qu'acoyeron a dalgunos de los desallugaos pol Katrina puen ""tornar en proyeutiles"", ante los fuertes vientos del huracán.

La bona noticia ye que, a un tris de tocar tierra nel oeste de Nueva Orleans y la costa de Luisiana, los pronósticos indiquen que l'huracán nun va algamar la categoría 4, según la escala de Saffir-Simpson. El Centru Nacional d'Huracanes esclarió que los vientos máximos de la tormenta diben ser d'unos 200 kilómetros por hora (125 milles por hora), con una categoría 3 d'intensidá.

La tormenta traxó con ella'l recuerdu del Katrina, de categoría 3 con foles d'hasta 8,5 metros, que golpió la rexón hai casi tres años, inundando'l 80 por cientu de la ciudá, dexando 1.500 muertos en cinco estaos y provocando daños contabilizaos en 80.000 millones de dólares."