El Conseyu d'Europa nun va adoptar sanciones escontra Moscú y va unviar una misión observadora a Xeorxa

"Los xefes d'Estáu y de Gobiernu de la Unión Euroepa nun van adoptar nel so conceyu estraordinariu de güei, en Bruseles, sanciones escontra Rusia pola so actuación nel conflictu de Xeorxa, anque sí van unviar al Kremlin ""un mensaxe unitariu"" de que la so reconocencia ""unillateral"" d'Abjazia y Osetia del Sur nun respeta los sos compromisos tomaos sobre l'acuerdu d'altu'l fueu, entamáu por Francia.

Tamién va aprobase güei l'unvíu d'una ""misión d'esploración"" compuesta por una ventena de persones p'atropar información sobre ""les necesidaes sobre'l terrenu"" y si los xefes d'Estáu y de Gobiernu de la UE lo avalen nel so conceyu, p'allanar tamién el terrenu al posible unvíu d'una misión d'observación de la Unión Europea, esplicaron fontes comunitaries.

Los tres grandes temes que van centrar el Conseyu européu de güei van incluyir l'ayuda de la UE a Xeorxa, tanto p'apoyar ""activamente"" la reconstrucción del país como a la población desplazada pol conflictu y la necesidá de buscar ""un acuerdu políticu"" que garantice la estabilidá pa la rexón en base al acuerdu d'altu'l fueu.

En tercer llugar, los xefes d'Estáu y de Gobiernu van aprovechar la cita pa entamar un primer alderique sobre ""les consecuencies de la crisis pa la política esterior de la Unión Europea"", especialmente nel contestu de les sos rellaciones con Moscú, esplicaron fontes de la presidencia de la UE.

Nesti sen y pese a que los xefes d'Estáu y de Gobiernu de la UE nun va adoptar sanciones escontra Moscú, sí van treslladar al Kremlin que la so decisión de reconocer a les rexones separatistes xeorxanes d'Osetia del Sur y Abjazia tien ""consecuencies y implicaciones"" y, en tou casu, constitúi una decisión ""inaceptable y condenable"" pa la Unión Europea por ser contraria al Derechu Internacional, al Acta de Helsinki y a delles resoluciones de la ONU que respalden la integridá territorial y soberanía de Xeorxa.

VOLUNTÁ D'ENTENDIMIENTU CON RUSIA.

A pesar de que Tiblisi reclamó a la Unión Europea presionar a Moscú bloquiando les sos aspiraciones d'ingresar na Organización Mundial del Comerciu (OMC) y hasta suspendiendo les negociaciones billaterales en marcha pa soscribir un nuevu Acuerdu d'Asociación y Cooperación ente la UE y Rusia, pel momentu, paez que la UE nun ta dispuesta a valorar posibles ""sanciones"" escontra Rusia.

Los Ventisiete sorrayarán que la so rellación con Rusia caracterízase ""pol entendimientu y la cooperación"" y que ""de parte europea nun hai voluntá d'aislar"" a Rusia y, muncho menos, de ""interrumpir el diálogu"" ente Bruseles y Moscú. Los cabezaleros europeos consideren que correspuende agora a les autoridaes ruses dicir ""si siguen dispuestos al entendimientu y cooperación con Europea"", esplicaron les fontes.

Sicasí, van unviar un mensaxe ""uníu"" al Kremlin p'alvertilu de que Bruseles y Moscú nun van poder caltener rellaciones ""normales dafechu"" si nun cumple de manera ""íntegra"" l'acuerdu d'altu'l fueu. Ello dexa nel aire la ""posibilidá"" de que les partes celebren finalmente la segunda ronda de negociaciones pa soscribir un nuevu Acuerdu d'Asociación y Cooperación p'actualizar el marcu llegal de les rellaciones billaterales y centráu, especialmente, na cooperación enerxética."