Chávez encamienta al embaxador d'EE.UU en Caraques a colar del país "si nun mide les sos pallabres"

"El presidente de Venezuela, Hugo Chávez, díxo-y al embaxador d'Estaos Uníos en Caraques, Patrick Duddy, que diba tener que colar el país si nun mide les sos pallabres, en referencia a unes declaraciones hostiles nes qu'aseguraba que'l tráficu de drogues ente dambos países aumentó nos últimos años, según informó 'ABN'.

El sábadu, l'embaxador Duddy llamentóse de que ""los narcotraficantes tán aprovechando la brecha qu'existe ente los dos Gobiernos (Estaos Uníos y Venezuela). Búrllense de nós mientres tamos metíos n'otres discusiones"".

Ante estes alusiones, Chávez constestó. ""Al embaxador d'EE.UU en Caraques yo recomiéndo-y que guarde les sos pallabres, nun vamos aceptar intervenciones de fuera, embaxador, n'asuntos internos; si usté viola los convenios internacionales tendría que colar d'esti país, nun aceptaríamos faltes de respetu, tendría qu'agarrar les sos maletes y colar de Venezuela"", señaló'l mandatariu.

Amás, el Gobiernu de Venezuela decidió contestar a les declaraciones que, según consideraben, poníen en duda la llucha antidrogues del país. Nun comunicáu, el Gobiernu esplicó que ""la llucha antidrogues en Venezuela rexistró progresos significativos demientres los últimos años, en particular dende que'l gobiernu bolivarianu punxo fin a los programes de cooperación oficial cola axencia estaounidense DEA"".

Nel 2005, el presidente Chávez suspendió los trabayos conxuntos que facíen les fuerces de seguridá venezolanes cola DEA, acusándola de tentar de desestabilizar al so Gobiernu, alegatos que l'axencia refugó. Dende entós, funcionarios antidrogues estaounidenses aseguren que'l tránsitu de droga per Venezuela aumenta, mientres que les autoridaes venezolanes presenten incrementos de les confiscaciones como demostración del éxitu de la so política antinarcóticos.

Venezuela acusa a esta entidá d'operar de manera criminal nel so territoriu, ""tanto cuando cometía delitos xunto a capos de la droga n'operaciones llamaes d'entrega controlada, como cuando conspiraba abiertamente escontra l'orde democráticu y constitucional del nuesu país""."