La Unesco reconoz el patrimoniu material asturianu

"El comité de la Unesco acaba declarar la candidatura de les cueves d'arte rupestre d'Asturies, Cantabria y País Vascu como Patrimoniu de la Humanidá nun conceyu que se celebró en Quebec.

Dientro d'esta candidatura tán les cueves asturianes de Tito Bustillo (Ribeseya), El Pindal (Ribedeva), Llonín (Peñamellera Baxa), La Covaciella (Cabrales) y La Peña (Candamu). De la candidatura formaben parte otros seis yacimientos de Cantabria - Chufín, Hornos de la Peña, Monte Castillo, El Pendo, La Garma y Covalanas - y otros trés del País Vascu - Santimamiñe, Ekain y Altxerri -.

El Comité del Patrimoniu Mundial de la Unesco fizo pública esta reconocencia na Asamblea Xeneral Añal que se celebra en Québec (Canadá) y a la qu'asiste'l direutor xeneral de Patrimoniu Cultural del Principáu, Adolfo Rodríguez Asensio.
La reconencia a les cueves del cordal cantábricu con arte rupestre paleolíticu produzse 23 años dempués de que la cueva d'Altamira fuere inscrita nesta llista. Los gobiernos d'Asturies, País Vascu y Cantabria promovieren la estensión de l'actual declaración de Patrimoniu de la Humandiá del yacimientu d'Altamira al conxuntu de los yacimientos del cantábricu d'asemeyaes carauterístiques.

La Unesco considera agora que les 14 cueves citaes axunten condiciones de ""escelencia asemeyaes a les d'Altamira, obra maestra del arte universal de tolos tiempos"", según informó la Conseyería de Cultural al traviés d'una nota prensa.

La gran importancia de los yacimientos asturianos llevó al Gobiernu del Principáu a plantegase nos años 90 la solicitú de la so inclusión na Llista del Patrimoniu Mundial Cultural y Natural, dientro del contestu d'una candidatura más amplia, denomada ""Arte Rupestre paleolíticu nel Cordal Cantábricu"". Asina, el 8 d'ochobre de 1997 nun conceyu celebráu en Santillana del Mar, los Gobiernos d'Asturies, Cantabria y País Vascu decidieron collaborar de cara a la redaición d'un proyeutu común que buscaba la declaración de dellos yacimientos cantábricos con arte rupestre como Patrimoniu de la Humanidá.

Les tes comunidaes autónomes solicitaron que la candidatura fuere considerada una ampliación de la declaración d'Altamira de 1985 por ser ésti un mecanismu que diba ayudar a llograr que la propuesta fuere almitida a trámite pola Unesco. El primer pasu p'algamar dicha declaración foi la inclusión nel denomáu Llistáu Indicativu Español. El llistáu indicativu ye un inventariu nel que s'incluyen los bienes que cada Estáu considera que puen ser incluyíos nel Llistáu del Patrimoniu de la Humanidá, incluyendo elementos culturales y naturales.

El ""valor universal esceicional"" de la candidatura basóse nel fechu de que la Cornisa Cantábrica constitúi ún de los territorios clásicos del arte rupestre paleolíticu del oeste d'Europa, axuntando na fastera comprendida ente'l ríu Nalón, al oeste de les cuenques de los ríos Pas y Besaya, al este, la mayor concentración de cueves con pintures y grabaos del Paleolíticu Superior.

El direutor xeneral de Patrimoniu Cultural, Adolfo Rodríguez Asensio, declaró, dempués de conocer la decisión de la Unesco, que'l ""patrimoniu asturianu, y l'arte paleolíticu en particular, recibió un gran apoyu"". ""Tamos énte una noticia de gran importancia. Hasta agora, l'arte paleolíticu sólo taba representáu al traviés d'Altamira y la nueva reconocencia de la Unesco supón qu'otres cueves con arte rupestre, de les que cinco son asturianes, algamen el mesmu rangu qu'Altamira, a la que complementen y fortalecen dende un puntu de vista científicu, artísticu y patrimonial"".

Dende'l puntu de vista del Principáu, les cinco cueves asturianes seleicionaes son los grandes esponentes de les 48 con arte rupestre que localizamos y estudiamos hasta la fecha. Caúna d'elles ye singular y en conxuntu formen un grupu que nun pue comparase, dende un puntu de vista artísticu, pola so calidá téunica y polo que signifiquen como representantes d'esi mundu de la espiritualidá d'hai más de 20.000 años.

Pa Rodríguez Asensio, la Unesco acaba de reconocer ""que tamos faciendo les coses bien, que les cueves tán en bon estáu y que son un bien de valor universal esceicional, lo que nos obliga a siguir calteniendo una bona política de conservación"". Amás, dende un puntu de vista turísticu, la declaración de la Unesco ""va facer más visible Asturies n'otres comunidaes autónomes y fuera d'España""."