Araz da'l saltu al papel

"El xueves 10 de xunetu a les 20.00 hores nel Salón d'Actos del Centru Municipal de L'Arena, asitiáu nel Parque de la Fábrica del Gas s/n, va tener llugar la presentación de la editorial Araz Llibros, un proyectu que naz col enfotu d'ufiertar a los llectores asturianos una serie d'obres que pol so valir científicu y rigor metodolóxicu van merecer l'atención del públicu.
Asina, la prioridá d'Araz Llibros ye abrir al llector a nuevos campos de conocimientu, hasta agora mui poco o nada trataos na nuesa llingua y, a lo menos na so primer etapa d'esistencia, con dos oxetivos claros: el xéneru ensayísticu como exa de les obres (l'ensayu na so estaya científica, técnica o humanística) y l'usu del asturianu como llingua vehicular de les publicaciones.

A la presentación asistirá Fernando de la Fuente Trabanco, director d'Araz Net, la empresa matriz de la editorial; y Pablo Rodríguez Alonso, responsable editorial d'Araz Llibros. Asina mesmo tarán presentes los autores de los trés primeros títulos editaos por Araz Llibros: Faustino Zapico Álvarez, autor de ""El nacimientu d'una nación. Historia de Sudáfrica""; Xabiel García Pañeda y Rubén Sánchez Antuña, autores de ""Dos visiones asturianes de les nueves tecnoloxíes""; y David Guardado Diez, autor de ""Llingua estándar y normalización llingüística""."