Zapatero comprométese a cumplir les resoluciones sobre'l votu inmigrante, l'albuertu y la muerte digna

"El secretariu xeneral del PSOE, José Luis Rodríguez Zapatero, asegura que tien el propósitu de que les resoluciones del Congresu sobre votu inmigrante, la reforma del albuertu y la muerte digna se cumplan nesta llexislatura y añadió que va entamase pola primer d'elles, anque sobre les otres nun dixo concretamente cuándo van producise.

Zapatero apuntó que, dende que ye secretariu xeneral del PSOE, procuró que les resoluciones de los congresos se lleven a la práutica. Pa eso, precisó, desíxense dos condiciones: per un llau, gobernar o tener mayoría nos parlamentos onde se puean aprobar y, per otru, tener voluntá política.

Asina, esplicó que si los dos requisitos se producen ""por supuesto, hai que cumplir"". Nesti sen, recordó que les resoluciones de los congresos anteriores cumpliéronse y ""mui especialmente les qu'afeuten a la estensión de derechos de ciudadanía, que son temes concretos, qu'afeuten a les persones y tienen una gran fuerza d'estensión de la democracia"".
Tres esta argumentación, sorrayó que les resoluciones del Congresu del PSOE ""van cumplise nel procesu de diálogu qu'hai que tener con otres fuerces polítiques"". ""Pero - añadió -, como nun podía ser d'otra manera, vamos facelo y amás, vamos entamar bien llueu"". ""Entamamos pola reconocencia del derechu a los inmigrantes de votar nes elecciones municipales"", adelantó.

INMIGRACIÓN: SIEMPRE HAI MÁS PAPISTES QUE'L PAPA

Al ser entrugáu sobre si la so postura en materia d'inmigración pue ser la del ""garrote"", y la ""zanahoria"", pol fechu de defender la direutiva europea en materia d'inmigración y dempués d'incluyir na direición del partíu a una muyer inmigrante, Zapatero respondió que ""siempre pue haber más papistes que'l Papa nesta materia"".

Primero defendió les sos polítiques en materia d'inmigración, asegurando que'l so partíu ye'l que fomentó más la inclusión y foi más respetuosu colos derechos fundamentales y la dignidá de los inmigrantes que nengún otru Gobiernu. Añadió qu'esto mesmo ye lo que dixo Bernarda Jiménez, que s'incorporó agora a la direición del PSOE.

NUN HAI FECHA PAL ALBUERTU NIN PAL LLAICISMU

Dao que'l Congresu nun marcó una llende temporal pa cumplir coles resoluciones, Zapatero comprometióse, tres ser entrugáu por ello, a cumpliles nesta llexislatura. Sicasí, no tocante a l'ampliación del albuertu, pidió que nun haya ""impaciencies"" y afirmó que va conocese en ""breve"". ""Van tener qu'anuncialo los que tienen la responsabilidá na materia"", recalcó.

Sobre'l calter laicu del Estáu, nel que se propunxera que nun se celebraren funerales d'Estáu y llueu suprimióse de la resolución final, Zapatero llimitóse a dicir que ""van cumplir les resoluciones del Congresu"".

En cuanto a otra de les resoluciones en política d'agua, el cabezaleru socialista dixo que nun se cambió nin una coma de la política del agua que venía desarrollando'l gobiernu y añadió, en rellación cola so postura sobre'l tresvase del Ebro, qu'aquello enmendáronlo, paróse y ""nun hai nengún cambiu""."