Zapatero fai un apueste pol cambiu xeneracional

"El 37 Congresu Federal del PSOE ye col que se pon el puntu al cambiu xeneracional na direición del partíu. Un cambiu que tien como máximu esponente a la ""númberu tres"" socialista, la nueva secretaria d'Organización, Leire Pajín, anque a lo llargo'l so discursu, Zapatero recordó que Felipe González tenía la mesma edá qu'ella, 31 años, cuando foi escoyíu como secretariu xeneral del PSOE.

Nesti sen, l'ex vicepresidente del Gobiernu, Alfonso Guerra, afirmó que la composición de la nueva Executiva, na que repiten 15 de los 31 miembros del anterior equipu direutivu, ye un apueste ""mui claru"" pola xente mozo, por ""una xeneración que tien el so propiu proyeutu"".

Menos entusiasta foi l'ex presidente d'Estremadura, Juan Carlos Rodríguez Ibarra, que se llimitó a dicir que nun conoz a la nueva y moza direición socialista y a proclamar que dempués d'esti Congresu da por ""finada"" la so carrera política.
Demientres el so discursu de clausura, Zapatero dirixóse a los más mozos del partíu de los que dixo que supieron puxar y renovar la tranquilidá que pue haber nos que tán nel Gobiernu. ""Ficísteisnos presente que naide como vosotros confía n'España"", proclamó Zapatero, que se desfizo n'allabancies a los que ""cada día tais más preparaos"" y poro, incorpórense ""como nunca a la direición del partíu"".

De siguío, el presidente del Gobiernu quixo matizar les sos propies pallabres y dixo qu'esta afirmación podía ser ""discutible"" porque cuando l'ex presidente del Gobiernu Felipe González entró a la secretaría xeneral tenía la edá de Leire Pajín, recién elixida como secretaria d'organización. Zapatero tamién-y dedicó un agradecimientu a los ""más veteranos"" pola ""xenerosidá, el saber tar y el saber ceder un pasu"". Nesti capítulu quixo facer menciones especiales pa Manuel Chavez, ""por ser como ye como persona, polo que representa, nada menos qu'a toa Andalucía"", y pa los vicepresidentes del Gobiernu, Pedro Solbes y María Teresa Fernández de la Vega.

No que cinca a la presencia de la Federación Socialista Asturiana na Executiva Federal, rescampla la incorporación d'Hugo Morán como secretariu de Mediu Ambiente y Mediu Rural y Marín y el mantenimientu d'Álvaro Cuesta, encargáu agora de la Secretaría Executiva de Llibertaes Públiques y Derechos de Ciudadanía."