Va salir tolos sábados del mes.
L'autocar que fai un percorríu pol paisaxe etnográficu de Villaviciosa torna esti xunetu "gracies a la maraviyosa acoyida d'esta actividá'l branu pasáu", apunten dende la Fundación José Cardín Fernández, qu'anuncia novedaes pa esta segunda edición del nomáu Bus Etnográficu. La salida va ser frente a la sede de la Fundación a les 10.30 hores, pa tomar rumbu pela AS-332 direición Sietes, onde va visitase la Casa l'Horru.
Mientres el trayeutu, tanto a la ida como a la vuelta, van facese delles paraes pa contemplar horros y paneres d'interés. La vuelta a Villaviciosa ta prevista sobre les 14 hores, con una posa última al llau de la ilesia de La Oliva.
Los asistentes van poder conocer les partes principales y importantes de cada horru, les diferencies ente horros y paneres, los distintos estilos dientro'l propiu estilu Villaviciosa y una historia breve d'esti elementu del paisaxe asturianu. Amás, va facilitase a cada visitante una pequeña guía informativa.
39 places por salida
El preciu pa facer esti percorríu nel Bus Etnográficu ye de 8 euros p'adultos y de 5, neños y neñes menores de 12 años. P'acutar plaza o ampliar información pue contautase cola Fundación José Cardín Fernández nel 985.89.29.38 o nel corréu electrónicu info@fundacioncardin.es.