Dolce años de Fiesta ensin Oficialidá

"El conceyu de Bimenes acueye un añu más la que ye la XII Fiesta de la Oficialidá de la Llingua Asturiana, qu'entamara'l 27 de xunu cola presentación del programa d'actos na Casa la Cultura de Santuyano.

Esti sábadu 5 de xunetu tendrá llugar el día grande de la Fiesta, qu'entamará col pregón na Casona de los Careaga (Xenra) a cargu de Xuan Xosé Mariño; fundador y direutor de Radio Sele. Darréu, a les 13.00 hores, El Corriellu la Pandorga acompañará la misa n'asturianu y la puya'l ramu.

Yá nel prau de la fiesta, tamién nel pueblu de Xenra, los grupos folklóricos Los Yerbatos (Bimenes) y Os Pauliterios de Constantin (Miranda del Douro) pondrán-y música a la xinta popular. Dempués d'esta, la tarde preséntase cargada d'actividaes, colos talleres de manualidaes pa neños y neñes, l'amosanza d'entibadores mineros y el IX Concursu de Gaiteros y Gaiteres Mozos.

Poniendo-y el puntu a la xornada'l grupu ""La Bandina"", qu'hai unos díes presentaba'l so últimu trabayu discográficu, va actuar nel prau de la fiesta nun conciertu qu'entamará a les 23.00 hores.

En 1997 Bimenes convertióse nel primer conceyu asturianu en declarar la llingua asturiana como oficial dientro del so territoriu. Lo que foi una fecha histórica pal asturianismu convertióse nuna fiesta que tolos años remocica'l compromisu del conceyu pa col idioma."