Ecoloxistes presenten alegaciones a la central de ciclu combináu d'El Musel

"La Coordinadora Ecoloxista d'Asturies anunció esti vienres la presentación d'alegaciones a la central de ciclu combináu que proyeuta HC Enerxía nel puertu d'El Musel (Xixón) en rempuesta al entamu de la tramitación preliminar del Estudiu d'Impautu Ambiental.

La Coordinadora Ecoloxista sorrayó'l so esmolecimientu énte ""el desproporcionáu"" interés de les empreses eléctriques por tramitar lo primero posible les autorizaciones ambientales ""escontra toa llóxica, nuna rexón mui contaminada y esportadora d'enerxía"".

Esti interés de les empreses eléctriques namás pue esplicase, a xuiciu de los ecoloxistes, poles facilidaes que dan conceyos como'l de Xixón y el Gobiernu asturianu a estes instalaciones ""que tantos problemes tienen n'otros llugares d'España, onde nun son a instalaes"".

Esta nueva central d'El Musel únese a les otres nueves previstes na rexón, amás competiría nel asitiamientu cola proyectada por Endesa d'asemeyada potencia, prevista nel mesmu llugar. La Coordinadora recuerda que la térmica d'El Musel va ocupar 68.000 metros cuadraos de l'ampliación del puertu, en frente de Xibares en Carreño, nuna comarca que ya tien ""mui mala calidá del aire"", como ye Xixón y Carreño.

Anque almiten que les centrales de ciclu combináu de gas contaminen menos que les de carbón, alvierten sicasí que nun son inofensives pa la salú y presenten emisiones significatives d'óxidos de Nitróxenu y de CO2. Pa la Coordinadora, ""la planta propuesta ye un casu claru d'escesu d'equipamientu innecesariu y de baldre, con un impautu que nun se xustifica en nengún casu""."