L.lagüezos acueye otra vuelta la Fiesta'l Corderu

"Los ayuntamientos de Quirós y L.lena celebren esti domingu, 6 de xunetu, la XLI edición de la Fiesta'l Corderu, declarada d'Interés Turísticu Nacional. El prau L.lagüezos, na llende ente los dos conceyos, acueye esta cita na que cuenten asase un total de 130 corderos.

Nesta edición participarán 13 asadores profesionales que prepararán 1.600 raciones que van repartise, a preciu de 18 euros, xunta con un platu de cerámica conmemorativu. La venta de papeletes entamará nel prau a les 9.30 la mañana y les raciones podrán retirase a partir de les 14.00 hores.

Amás de la xinta la Fiesta'l Corderu d'esti añu ufierta música, baille, teatru y el tradicional homenaxe a los güelos del Aramo. Nesti casu los reconocimientos dirán pa Domitila Álvarez Álvarez, de Salceo (Quirós), y Silvino Fernández Viesca, del Venceyal, nel val.le de Muñón (L.lena).

D'otru llau, y yá pela tarde, habrá xuegos pa la reciella, y a partir de les 17.00 hores la cantante Anabel Santiago ufrirá un conciertu.

Nel casu del conceyu de L.lena, l'Ayuntamientu completó la programación del prau con actividaes en La Pola, del 4 al 6 de xunetu, ente les que rescampla'l I Certame d'Artistes na Cai, que se celebrará'l sábadu día 5."