UPyD espresa la so solidaridá col profesor Fernández de Castro

"El partíu Unión, Progreso y Democracia (UPyD), ensin representación n'Asturies, espresó-y esti vienres el so ""apoyu y solidaridá"" al profesor de Filoloxía Félix González de Castro, ""que nos últimos díes ta sufriendo delles amenaces, que llegaron inda a la intimidación física, pola so posición en rellación a los estudios d'asturianu na Universidá"".

Al traviés d'un comunicáu, UPyD afirmó que ""ye intolerable que, seya la que seya la opinión académica que tenga caún pa cola llingua, nuna sociedá democrática como la nuestra, quede frayada la llibertá d'un ciudadanu, se-y insulte y coaccione namás por defender les sos posiciones no tocante a una determinada llingua"".

Pal partíu encabezáu por Rosa Díez, ""estes actitúes que denoten un mal que desgraciadamente ta atravesáu en dellos sectores de la sociedá española, hasta camudar les distintes llingües del nuestru país n'armes, n'auténticos elementos d'esclusión y d'enfrentamientu ente ciudadanos; cuando les llingües son, penriba de too, una riqueza cultural y un vehículu de comunicación y entendimientu"".

Señala tamién que ""estes actitúes son verdaderamente minoritaries, lo que nun torga que situaciones como la vivida pol profesor Fernández de Castro tengan que salir del ámbitu priváu y académicu y camudar nun asuntu públicu que-y correspuende denunciar y combatir a tola sociedá"".

Nel testu aprovechen tamién pa espublizar el manifiestu en Defensa de la Llingua Común, invitando a ""sumase a tolos asturianos""."