El Plenu de Llaviana aprobará la ordenanza d’asturianu

Esti miércoles, a les 19 hores, va celebrase’l Plenu de Llaviana, onde ún de los puntos del día ye l’aprobación inicial de la Ordenanza Municipal d’Usu de la Llingua Asturiana del conceyu. René Durán ye l’impulsor d’esta iniciativa que xestionó Somos Llaviana.

Esti ciudadanu llavianés, que vien trabayando dende hai dos años na convocatoria del premiu lliterariu infantil El Xarabatu, contautó cola candidatura de xunidá popular pa presentar un borrador d’ordenanza cola posibilidá de que lu treslladaren al restu de grupos municipales. “Tomé como base la de Ḷḷena y adaptéla a les necesidaes del conceyu”, esplica Durán.

D’ello hai yá un añu y cuatro meses, recibiendo’l preste tanto d’Izquierda Xunida (IX), PP y Foro, y llevándolo Somos Llaviana a Plenu pa que l’equipu de gobiernu del PSOE se fixera cargu del mesmu. Pese a que s’aprobara la redaición de la mesma, l’asuntu quedó paráu hasta que saltó la polémica pola situación del Serviciu de Normalización Llingüística, agora –y hasta fin d’añu– ensin subvención, esternalizáu y con 8 hores d’actividá selmanal.

“Les reuniones que caltuvimos cola conceyala pol tema del SNL sirvieron pa reactivar l’asuntu y ayeri yá se presentó’l testu definitivu –tres dalgunes modificaciones a partir del primer borrador– en Comisión, que va güei a Plenu”, rellata Durán, que cuenta con que salga alantre la so aprobación inicial con consensu. Depués espublizaráse nel BOPA pa la presentación de posibles alegaciones enantes de l’aprobación definitiva en Plenu.

La mayoría nel Conceyu de Llaviana tienla’l PSOE, con 8 conceyales, siendo’l segundu partíu con más representación IX, con 4. Somos Llaviana cuenta con 2, al igual que’l PP, mentes que Foro tien 1.

Semeya obra de Denis Soria baxo llicencia CC BY-SA 4.0.