Andecha Astur acusa a Fernández de Castro de "victimismu"

"Andecha Astur consideró esti xueves ""patético dafechu"" que Fernández de Castro, el profesor que presentó la enmienda que refugaba la especialidá d'asturianu de la propuesta de Filoloxía, ""pretenda presentase énte la sociedá asturiano comu víctima en función de pretendíes amenaces recibíes comu repuesta al so comportamientu represor"".

Al traviés d'un comunicáu, la organización nacionalista acusó amás al profesor de la Facultá de Filoloxía de tentar de ""euskaldunizar"" el conflictu llingüísticu con afirmaciones como ""agora compriendo perbien dellos testimonios que mos lleguen d'otros llugares"", una estratexa que consideren ""vien siendo avezada ente los siguidores del arecismu y qu'Andecha Astur considera tremendamente peligrosa"".

La organización entiende que ""más llamentable entá ye que s'escude nel fechu de que la enmienda por él presentada saliere alantre tres una votación democrática 'a cara descubierta' comu si nun fuere evidente que comu consecuencia d'un procesu aparentemente democráticu puean llegar a tomase decisiones antidemocrátiques dafechu y/o a la escontra de los derechos humanos"". Les llexislaciones racistes vixentes en dellos estaos, la pena muerte, el procesu del III Reich o la direutiva europea d'inmigración son dalgunos de los exemplos d'Andecha.

La formación fizo un ""llamáu al profesor Fernández de Castro y a los que s'alcuentre tres d'él pa que, yá que nun ye quien a aceutar una situación de normalidá democrática, cese nos sos intentos de criminalización y victimismu, qu'en nada ayuden y que tán faltos de credibilidá"".

""Toos sabemos quién son los represores y quien les víctimes. Ye más, conocíu'l so posicionamientu políticu con afirmaciones tales comu 'yo no puedo respaldar una inclusión que contribuye a reforzar la imagen del asturiano como lengua nacional', consideramos que les pretendíes ""amenaces ya 'intimidaciones'"" por él denunciaes, puean nun axustase dafechu a la realidá, pudiendo tar realizaes col únicu oxetivu de dar fuerza ""a la so postura política""."