Anasagasti ataca'l "Manifiestu pola llingua común" entamáu por Rosa Díez

"El senador del PNV Iñaki Anasagasti atacó na tarde del xueves a la cabezalera de la Unión, Progresu y Democracia (UPyD), Rosa Díez, a la que califica de ""soberbia, vanidosa y cara dura"" nomándola'l ""kleenex"" que la estrema derecha usa ""d'ariete"" pa mover ""a un Rajoy que quier dir a un centru políticu dexando l'antipatía del discursu broncu d'Acebes, Zaplana, Aznar, Astarloa y compañía"".

Nun artículu de la so páxina personal n'Internet, que titula ""¡Ven y Cuéntalo!"", Anasagasti entama criticando la recoyida de firmes que Díez protagonizó'l pasáu domingu a favor del ""Manifiestu por una Llingua Común"" en Bilbao, onde llogró que ""cien vieyos del PP"" soscribieren el citáu documentu ""pa la so cruzada anti-euskara"".

Asina mesmo céntrase en recordar el pasáu políticu de la ex eurodiputada socialista al frente de la Conseyería de Turismu y Comerciu del Gobiernu vascu pa contraponelu cola so imaxe actual. Dende'l so puntu de vista Rosa Díez tornó ""en tolo contrario de lo qu'un día defendió"". ""Como dixo Groucho Marx: sin nun-y presten los mios principios, nun se preocupe, tengo otros"", añade.

""De ser la conseyera d'un Gobiernu que protestara pola falta de tresferencies pasó a pidir la recuperación per parte del Gobiernu central de les mesmes"", sostién el políticu vascu, quien acusa a la vocera d'UPyD nel Congresu de tar ""n'otra trinchera"" y ""disparando insultos escontra tolo que se mueve nel mundu vascu"". ""Y neso ta -sorraya-, ayudada pola so gran soberbia, pola so gran vanidá, pola so gran cara dura"".

Según señala, nengún de los sos compañeros nel Gobiernu d'Ardanza la recuerda ""tan sensibilizada pola imposición del castellán sobre l'euskara, nin sobre la necesidá d'una llexislación estatal qu'anulare los perfiles propios del estatutu de Gernika"". ""Sí la recuerden faciendo un bon trabayu sacando a pasiar aquellos sombreros que facíen que llamara l'atención sobre los sos viaxes promocionales y la recuerden por aquella campaña con aquel bon eslogan que dicía 'Ven y Cuéntalo'"", fina."