Ana Cano recuerda que'l nuevu decanu tien de salir d'un procesu d'elecciones

"La ex decana de la Facultá de Filoloxía de la Universidá d'Uviéu, acabante de dimitir, Ana Cano, recordó esti miércoles que'l llabor del nuevu decanu, José Antonio Martínez, nomáu pol rector Vicente Gotor, ha ser la convocatoria d'elecciones, basándose nel Reglamentu Electoral de Centros, Departamentos ya Institutos.

Cano espresaba asina, en declaraciones a Europa Press, la so opinión sobre'l nomamientu del so sustitutu, procesu pal que nun foi consultada en nengún momentu.

Pela so parte'l rector afimó que nun-y preocupaba tanto la convocatoria de nueves elecciones como que reconduza la situación creada en filoloxía tres la so dimisión, motivada pola aprobación d'una enmienda na Xunta de la Facultá, a favor de la supresión de la especialidá d'Asturianu de la propuesta de títulu de grau.

La ex decana mostró en primer llugar les sos reserves sobre'l calter consensuáu del escoyíu, prometíu por Gotor. ""A mi, concretamente, nun se me consultó pa nada sobre esti tema, asina que nun pueo facer valoraciones sobre esta persona"". Recordó, sicasí, que ""l'artículu 26 párrafu primeru del Reglamentu Electoral de Centros, Departamentos y Institutos sobre la elección de decanu y de direutor de centru, diz que les elecciones van convocase dientro de los 20 díes siguientes al de finalización de mandatu, cuando ésti acabe por dimisión, o se dean otres causes de cese previstes"".

""Yo nun sé en qué condiciones el rector noma un decanu o decana pa la facultá, pero dende llueu, entiendo que tien d'axustase a lo que diz el Reglamentu"", añadió. ""Nun ye qu'haya falta o non de convocatoria electoral, ye que ta estipulao"", afirmó. Recordó tamién que nun se puen convocar les elecciones en periodu vacacional nin d'exame, pero ""van tener que ser a partir de setiembre"".

NUEVU GOBIERNU, NUEVA SITUACIÓN

El deséu d'Ana Cano ye que seya l'equipu decanal saliente de les elecciones el que ""reconduza la situación"", y nesi sen recordó que va tar na so mano aceptar o non lo aprobao na última Xunta. ""L'equipu decanal nuevu pue reconsiderar la situación porque nin siquiera tien por qué aceptar les propuestes que fueron aprobaes. Hai otru gobiernu, y poro hai una situación nueva"", sentenció.

""Al haber otru gobiernu, esi equipu pue asumir lo que se fizo o non. Y dende llueu, (el fechu d'aprobase la enmienda sobre l'asturianu) nun quier dicir que nunca más se puea volver a plantegar la cuestión. Yo espero qu'esto puea volver a reconducise, sinceramente"", espresó la tamién presidenta de l'Academia de la Llingua Asturiana. ""Espérolo porque unes veces gánense les votaciones y otres piérdense. Y el tema del asturianu ye la primer vez que pierde la votación. Otru día'l resultáu pue ser otru porque depende de les persones que participen na la votación"", señaló."