Greenpeace alvierte del aumentu de la urbanización na costa asturiana

"Nel informe ""Destrucción a toa costa 2008"" la organización sorraya la perda de suelu pa la espansión de les zones lloxístiques y comerciales y el ""claru avance de la urbanización nes zones costeres asociáu a les nueves infraestructures viaries"".

En dichu informe alviértese de la existencia de puntos negros como la contaminación industrial ""severa"" nel puertu de Xixón, la destrucción de les llamuergues de Recastrón y la contaminación tamién ""severa"" na ría d'Avilés, asina como la urbanización La Talá, a menos de 500 metros de la llinia de costa de Llanes, el nuevu puertu na playa de Borizu, tamién en Llanes, o la contaminación na ría de Navia.

Greenpeace considera que ""Asturies pue ser, bien llueu, la próxima pieza a cobrar poles constructores urbanístiques"", teniendo en cuenta que ""la fastera mediterránea ta agotada pola saturación"". De la mesma manera, alviértese del fechu de que l'autovía del Cantábricu vien xenerando dende hai años una presión urbanística ""ensin precedentes"" en tola rasa cantábrica.

Pa la organización, llama l'atención que nos conceyos de la franxa oriental ta prevista la construcción de más viviendes qu'habitantes tien nesti momentu. Sólo en Ribedeva, Llanes, Ribesella, Caravia y Colunga prevénse más de 30.000 edificaciones y tienen cerca de 26.000 vecinos.

Nel casu de Xixón prevése la construcción de más de 20.000 viviendes y en Muros del Nalón va pasase de 1.500 viviendes a 4.000. Nel informe dedícase un apartáu a la zona portuaria de Xixón, polos sos altos niveles de contaminación y pol impautu ambiental que va suponer l'ampliación d'El Musel. Al so xuiciu, esta ampliación ""pue traer consecuencies sobre les corrientes, tresporte d'arenes y vertíos"". En cuanto a la zona d'Aboño, los ecoloxistes consideren que la ""presión industrial ye mui alta""."