El rector confirma'l nomamientu de José Antonio Martínez como decanu de Filoloxía

"El rector de la Universidá d'Uviéu, Vicente Gotor, confirmó esta tarde'l nomamientu de José Antonio Martínez como nuevo decanu de la Facultá de Filoloxía, tres la dimisión de l'anterior responsable del cargu, la tamién presidenta de l'Academia de la Llingua Asturiana, Ana Cano.

En declaraciones a Europa press, Gotor esplicó que-y espresó a Martínez el so deséu de que ""reconduza la situación"" creada tres la dimisión de Cano pola aprobación d'una enmienda na Xunta de la Facultá que suprimía la especialidá d'asturianu de la propuesta de títutulu de grau.

Gotor ofreció esta mañana'l cargu a Martínez, profesor del Departamentu de Filoloxía Española, y confirmó poco dempués que'l nuevu decanu diera la so aceptación al cargu. ""Preocúpame que trabaye nel tema y que podamos reconducir la situación"", afirmó'l responsable académicu, ensin croncretar les actuaciones que debería llevar el nuevu decanu p'algamar tal fin con respeuto a la enseñanza d'asturianu.

""Tien de ser el nuevu decanu, col equipu que nome, el que forme comisiones y, d'acordies cola Xunta, tome decisiones nes que salgan beneficiaes toles humanidaes"". ""Hai que velo como un tou"", añadió Gotor.

Ana Cano y tol so equipu rectoral anunciaron la so dimisión el pasáu martes tres la decisión de la Xunta de Facultáu d'aprobar una enmienda na que se suprime l'asturianu como especialidá na propuesta de la estructura académica de cara a los nuevos títulos de grau. La decisión contó con 34 votos a favor, 30 a la escontra y siete votos en blancu.

La situación provocó tamién qu'un grupu d'unos 20 estudiantes, en collaboración cola Xunta Pola Defensa de la Llingua Asturiana, entamare'l vienres un enzarru nel edificiu del Rectoráu como midida de protesta. Los enzarraos punxeron el puntu a la protesta esti martes, dempués de valorar el compromisu de Gotor de dar un tratamientu académicu y científicu al asturianu na Universidá."